هەڵوێست ئیران لە باوه‌ت دەسگیرکردن کەسەیلیگ لە کەتایب حزبولڵا
شەفەق نیوز/ وه‌زاره‌ت دەرەوەی ئیران، ئمڕوو دووشەممە، وت: دەسگیرکردن کەسەیلیگ لە کەتایب حزبولڵا له لایه‌ن ده‌سه‌ڵاته‌یل عراقی باوەتیگ ناوخۆییه، و تەهران دەسوردان لە باوەتەیل ناوخۆیی عراق نیەکەێد.
لە یەکەمین ساعەتەیل جومعەی گوزەیشتە ، هێزیگ لە دەزگای دژەتیرۆر، لە باشوور بەغداد پایتەخت، هەڵمەتیگ کردە بان بارەگایگ کەتایب حزبولڵای سەروە ئیران، و ١٤ کەس لەلیان دەسوەسەر کرد.
لە هه‌ڵویستیگ وه‌زاره‌ت ده‌ره‌وه‌ی ئیران ک ئاژانس شەفەق نیوز چەودیری کرد، دیاری کرد: حەشد شەعبی هێزیگ عراقیە، وە رای وەرپرسەیل و مەرجعیەیل عراق دروس بوی، و بویە هێزیگ فەرمی لە عراق.
وه‌زاره‌ت دەرەوەی ئیران باس لە بڕوایی وە توانای حکومەت عراق کرد، لە پشتسه‌رنان قەیرانەیل و وەڕیەوبردن باوەتە ناوخۆیەگان وە خاسترین شیوە، ك عراق وەرەو ئارامی و ئاسایش به‌ید.
واشینتون تومەتبار کەتایب حزبولڵا کەێد وە ئامانجکردن سەرباز و فەرمانبەرەیلی لە عراق، و بڕ فرەی لە مووشەکەیلی ك لە کۆتایی ساڵ ٢٠١٩ دامەزراوە عراقیەگان و شوون پیشوازی دوبلۆماتكارو سەربازەیل بیگانە کردە ئامانج . لەلیان شەش پەلامار لە ماوەی دوو هەفتەی گوزەیشتە بوی.
