يه‌كه‌م په‌يام ئه‌مريكا ئه‌را عه‌لاوى له‌باره‌ى عراق و ئيران
شه‌فه‌ق نيوز/ وه‌ربرسيگ باڵا له وه‌زاره‌ت خارجيه‌ى ئه‌مريكا، داوا له محه‌مه‌د ته‌وفيق عه‌لاوى سه‌رۆك وه‌زيره‌يل راسپارياێ كرد جواو داواكاريه‌يل ملله‌ت عراقى بيه‌ێد و رێگرى له گه‌نده‌ڵى بكا، ئاماژه وه‌يه‌يش كرد ئداره‌ى ئه‌مريكا له‌گشت ئاستيگ هاوكاريه‌و وه‌ل حكومه‌ت عراقييه‌و شيه‌وكردن ئه‌كا له‌چوارچيوه‌ى په‌يوه‌نديه‌يل ستراتيجى گشتگير ك هه‌روگ وڵات گرده‌و ئه‌كا.
له‌ى باوه‌ته‌و، وێستگه‌ى عه‌ره‌بى له زووان ئه‌و وه‌رپرس ئه‌مرييكه‌و ك نه‌تواسگه ناوى ئاشكرا بكا، وت: لێكچگنيگ هه‌س له‌ناونى بارودوخ حكومه‌ت لوبنانى و باوردوخ حكومه‌ت عراقى، وه‌ل ئه‌وه‌يشا چينيگ له ملله‌ت عراقى پشتگيرى حكومه‌ت ئه‌كه‌ن و چينيگيش ناڕازى و ئيمه‌يش لايه‌نگرى خوه‌ينيشانده‌ره‌يل و مافه‌يليان ئه‌كه‌يم وه خوه‌ينيشانداين ئاشتيانه، حكومه‌ته‌يل يه‌ك له‌شوون يه‌ك عراقيش پڕ له گه‌نده‌ڵى بوينه‌و ئيمه‌يش چه‌وه‌ڕێ دامه‌زرانن حكومه‌ت تازه و په‌سه‌نكرياێ له ئه‌نجومه‌ن نوێنه‌ره‌يله‌و ئه‌كه‌يم، وه‌لێ هه‌وه‌جه وه شه‌رعيه‌ت له ملله‌ته‌و ديرێد.
ئه‌و وه‌رپرسه هه‌ميش وت: تێبينى ئه‌وه كرديمنه شماره‌يگ فريه له خوه‌ينيشانده‌ره‌يل ته‌نيا نه‌ك هه‌ر داواى خزمه‌تگوزايه‌يل و خاسسازى و له‌ناوبردن گه‌نده‌ڵى، به‌ڵكوو داواى دويره‌وخستن نفوز ئيرانييش ئه‌كه‌ن جوور ئه‌وه‌گ قاسم سلێمانى ك له عراق بوى و بڕيار له‌باره‌ى ئه‌وه دياد ك بدێده سه‌رۆك وه‌زيره‌يل ئاينده، يه‌يش له‌وه‌ختيگ شماره‌ى فريه‌يگ له عراقيه‌يل ئى ده‌خاڵه‌تكاريه ره‌ته‌و ئه‌كه‌ن و داواى سه‌روه‌رى ئه‌كه‌ن و ناخوازن ده‌وران وه مه‌يل ئيران بدێ و ناخوازن ئه‌و بڕياره‌يله ك تايبه‌ته وه ژيانيان له ته‌هرانه‌و ده‌ربچێ له‌جياى به‌غدا، هه‌ر وه‌و خاتريشه ئه‌و وه‌رپرسه په‌ياميگ ئاراسته‌ى ته‌هران كرد و وت: بايه‌سه ئيران ئه‌وه هه‌ڵوژنێد يا بدێده ده‌وڵه‌تيگ هاوسا يا ده‌وڵه‌تيگ ده‌خاڵه‌تكار و زاڵبوێ له‌بان عراق.
