شه‌فه‌ق نيوز/ پۆليس پاريزگاى نه‌جه‌ف، له‌و وشداريه‌يله‌ كه‌مه‌و كرد ك له‌لايه‌ن لوئه‌ى ياسرى پاريزگاره‌و باس كرياگه‌و جه‌خت له‌وه‌يش كرد گشت ده‌زگايه‌يل ئه‌منى هانه‌ حاڵه‌ت بار له‌ناكاو له‌وه‌ختيگه‌و خوه‌ينيشانداين ده‌س وه‌پيكردگه‌و هه‌وه‌جه‌ وه‌ بڵاوكردنه‌وه‌ى دعايه‌و رخه‌وبردن ناكا.

پۆليس له‌ به‌ياننامه‌يگ وت: له‌ى ماوه‌ى دوياخره‌ دعايه‌يل فريه‌يگ ژنه‌فتيايم و له‌وانه‌يش له‌باره‌ى ئه‌وه‌گ گوايا ده‌زگايه‌يل ئه‌منى هانه‌ ئنزار(ج)، وه‌لێ ئه‌خوازيم بويشيمنه‌ رووڵه‌يل پاريزگاگه‌ ك ده‌زگايه‌يل ئه‌منى هانه‌ ئنزار له‌وه‌ختيگه‌و خوه‌ينيشانداين له‌ عراق ده‌س وه‌پيكردگه‌و ئه‌رك بنه‌ڕه‌تى ئيمه‌يش ئه‌وه‌سه‌ مقه‌يه‌تى له‌ خوه‌ينيشانده‌ره‌يل بكه‌يم و رێ وه‌ ئه‌نجامداين تاوان و تاوانباره‌يل نه‌يه‌يم.

به‌ياننامه‌گه‌ هه‌ميش وت: ئه‌وه‌گ دعايه‌ بڵاو ئه‌كا هه‌وڵ ئه‌وه‌ ئه‌ياد نه‌خشه‌ى خراويگ بكيشێد له‌بان پاريزگاگه‌و په‌يام نيگه‌رانى ئه‌را كۆمه‌ڵگا بڵاوه‌و بكاو ترس و له‌رزه‌ له‌لاى خه‌ڵك نه‌جه‌ف دروس بكا.

جى باسه‌، يه‌يش له‌وه‌ختيگه‌ زويتر پاريزگار نه‌جه‌ف له‌ يه‌كيگ له‌ كه‌ناڵه‌يل ته‌له‌فزيۆنى ده‌ركه‌فت و وشدارى دا له‌وه‌گ پاريزگاگه‌ ره‌سيه‌سه‌ كنار رميان له‌ئه‌نجام جه‌نگ و ناكووكى له‌ناونى خوه‌ينيشانده‌ره‌يل و پاسه‌وانه‌يل مه‌زارگه‌ى محه‌مه‌د باقر حه‌كيم سه‌ركرده‌ى ئه‌نجومه‌ن باڵاى ئسلامى.