شەفەق نیوز/ هەردوگ شاند عراق و ئیران، لە تەهران، ئمڕوو سێشەممە، کۆبونەوەی فراوانیگ کردن ئەرا باسکردن و لەیەککردنەوەی سەختەیل گەورایگ لە ری گەشەکردن پەیوەندیەگان ناوبەین هەردوگ وڵاتەگە. کۆبونەوەگە وەسەرۆکایەتی موستەفا کازمی سەرۆک وەزیرەیل و سەید ئیسحاق جهانگیری جیگر یەکەم سەرۆک کۆمار ئیران بەسیا.
بەیاننامەیگ لە نووسینگەی کازمی رەسیە ئاژانس شەفەق نیوز وت: کۆبەنەوەی فراوانیگ باس باوەتەیل خشتەی کارەگان کرد، و گەشەکردن ئاسۆەیل هاوکاری لە به‌شه‌ جوورا جوورەگان لە کەرتەیل ناوبەین هەردوگ وڵاتەگە، و ریەیل وەپشتسەرنان سەختیەگان، و رەدکردن لەو گیچەڵەیلە ک شایەت لەڕی هاوکاریە هاوبەشەگان بووسێد.
بەیاننامەگە باس لە قسەگەی کازمی کرد ک وت: عراق چەودیری لە دروسکردن خاسترین پەیوەندی کەێد له‌ ناوبەین هەردوگ وڵاتەگە لە بان بنەمای بەرژەوەنی هاوبەش، ئه‌را خزمەت وه‌ هەردوگ گەل هاوسا.
وتیش؛ سەختیەیل گەورایگ ها نوامان، و بایەسە وەیەکەو کار بکەیمن ئەرا وەپشتسەر ناینیان، و لە پلەی یەکەمیان سەختیە ئابووری وتەندروسیەگان ئیسەس ک گەلەگە کەفتیەسە وەری.
لەلای خوەییش؛ جهانگیری دووپاتکرد لە پشتگیری ئیران ئەرا ئارامی عراق، و هاوردنەوەی گشت دەورەگەی لە ناوچەگە، و باس لە ئومید خوەی کرد ک گامەیل هاوکاری هاوبەش ناوبەین هەردوگ وڵاتەگە دەسمیەت بیەێد لە وەپشتسەرنان سەختیەگان، جوور پەتای کۆرۆنا، و قەیرانە ئابووریەگە لە ئەنجام داوەزین نرخەیل نەفت.