شەفەق نیوز/ سەرچەوەیگ چەودێر، ئمڕوو سێشەممە، باس کرد ک شاند حکومەت هەرێم کوردستان وەسەرپەرشتی قوباد تاڵەبانی جیگر سەرۆک وەزیران، لەماوەی سێ روژ ئاینده‌ سەردان بەغداد کەێد، ئەرا تەواوکردن گفتوگۆ دوولایەنەی ناونی هەردوولاگە ئەرا چارەسەر ناکۆکی وباوەتە دویاخریایەگان، وه‌تایەبەت ئەوەی پەیوەندی وە بەش هەرێم لە بوودجە، وخەرجکردن مووچە، وهەناردن نەفت دیرێد.
سەرچەوەگە ئەرا ئاژانس شەفەق نیوز وت: شاندەگە لەو ماوەی وەرینە چەوەڕی تەواوکردن كابینه‌ی حکومەت فیدڕاڵی کردیان، تا بچنه‌و ئەرا بەغداد و گفتوگۆەیل دوباره‌ بکەن.
سەرچەوەگە وتیش؛ ئومیدیگ هەس تا بڕەسنە رێککەفتنیگ لەبان چارەسەری گشت گرفتەگان ک لەو سەردانە وەرینەگان شاندەگە خستەیانە وەردەس. وەرجەیە هەمیش شاند حکومەت هەرێم دوو سەردان بەغداد کرد، دویای وسانن مووچەی فەرمانبەرەیل و کارمەنەیل کەرت گشتی لە هەرێم کوردستان لە لایەن حکومەت فیدڕاڵی وەرین وەسەرۆکاتی عادل عەبدلمەهدی.
ناکۆکیەگان و باوەتە دویاخریایەگان ناونی هەولێر و بەغداد جەختی هابان بەشەگەی هەرێم لە بوودجە وشایستەیل داراییه‌یل هێز پێشمەرگە، وهەناردن نەفت، وناوچە دابڕیایەگان ک هانە ناو مادەی ١٤٠ لە دەستور هەمیشەیی عراق.
حکومەت هەرێم کوردستان لە بڕیگ لە بونەگان ئامادەیی خوەی نیشاندا لە ته‌سلیم ٢٥٠ هەزار بەرمیل لە نەفت خام روژانە، وەرانوەر خەرج کردن مووچەی فەرمانبەرەیل وە ٤٥٠ ملیار دینار مانگانە لەلایەن حکومەت فیدرالی عراق.