عه‌لاوى ئه‌را بارزانى: عراق هه‌وه‌جه وه رۆڵ كاريگه‌ردان ديرێد له پاراستن ديموكراسى
شه‌فه‌ق نيوز/ ئه‌ياد عه‌لاوى سه‌رۆك ئئتلاف نيشتمانى له ميانى ديدارى وه‌ل سه‌رۆك پارت ديموكرات كوردستان باس له رۆڵ خاس و كاريگه‌ر بارزانى كرد و يه‌يش ده‌رخست ك ئمڕوو عراق هه‌وه‌جه وه‌و رۆڵى ديرێد وه‌شيوه‌يگ فراوانتر ئه‌را مقه‌يه‌تيكردن له ديموكراسيه‌ت.
نوسينگه‌ى سه‌رۆك پارت ديموكرات له به‌ياننامه‌يگ وت: بارزانى له باره‌گاى خوه‌ى له هه‌وارگه‌ى سه‌ڵاحه‌دين چه‌وى كه‌فته‌سه ئه‌ياد عه‌لاوى سه‌رۆك ئئتلاف نيشتمانى و سه‌رۆك گردبوينه‌وه‌ى مه‌نبه‌ر عراقى و شانديگ ياوه‌رى و له سه‌ره‌تاى ئه‌و ديداريشه عه‌لاوى باس له گردبوينه‌وه‌ى مه‌نبه‌ر عراقى كردگه‌و وه ئه‌وه‌گ گردبوينه‌وه‌يگ فراوانه‌و پيكهاتگه له كه‌سايه‌تيه‌يل موعته‌دل و نيشتمانى و كار له‌وه‌ر ئه‌وه ئه‌كا گشت پيكهاته‌يل عراق نه‌ته‌وه‌يى و ئايينى يه‌كسان بوون.
به‌ياننامه‌گه باس له‌وه‌يش كرد عه‌لاوى ريز و حورمه‌ت ئه‌را رۆڵ خاس و كاريگه‌ر مه‌سعود بارزانى سه‌رۆك پارت ديموكرات كوردستان ده‌رخستگه‌و ئاماژه وه‌يه‌يش كردگه رۆڵ بارزانى له‌بان ئاست عراقى و كوردستانى فريه كاريگه‌ره‌و ئمڕوو گشتلايگ هه‌وه‌جه وه‌و رۆڵ ديرن وه‌شيوه‌گ فراوانتر له‌وه‌ر مقه‌يه‌تيكردن ديموكراسى له عراق.
