كوردستان وه بوونه‌ى جه‌ژنه‌يل له‌دايگبوين ئاڵشتكارى له كار موليده‌يل ئه‌هلى ئه‌كا
2019-12-25 18:53:01
شه‌فه‌ق نيوز/ وه‌ڕيه‌وبه‌رايه‌تى گشتى كاره‌باى پاريزگاى سلێمانى له هه‌رێم كوردستان، ئاشكراى ئه‌وه كرد ك بڕيار داگه ئاڵشتكارى له كار موليده‌يل ئه‌هلى ئه‌كا وه‌بوونه‌ى سه‌رساڵ تازه‌ى زايينى 2020.
وه‌ڕيه‌وبه‌رايه‌تيه‌گه وه‌گووره‌ى كتاويگ فه‌رمى له جواو قايمقاميه‌ت ناوه‌ند سلێمانى ئاماژه وه ئه‌وه كرد وه‌بوونه‌ى پشوو سه‌رساڵ تازه‌ى زايينى ك له رووژ چوارشه‌ممه 25 كانون يه‌كه‌م تا 3ى كانون دويه‌م ئاينده ده‌س وه‌پى ئه‌كا, موليده‌يل ئه‌هلى ئه‌خريه‌نه كار له سه‌عات 10ى شه‌وه‌كى تا سه‌عات يه‌ك شه‌و وه‌گوورى هه‌وه‌جه.
جى باسه، كتاوه‌گه باس له‌وه‌يش كرد ئى ئاڵشتكاريه له يه‌كه‌م رووژ پشوو ده‌س وه‌پى ئه‌كا تا دويا رووژ جه‌ژنه‌يل له‌دايگبوين، ك دوياى ئه‌وه‌يش ئه‌چێده‌وه بان خشته‌ى ئاسايى خوه‌ى.
