شەفەق نیوز/ ئیوارەی دویەکە جومعە، سالم داوود ک چالاکوانیگ مەدەنیە لەشار خانەقین، پۆلیس خانەقین دەسوەسەری کرد، وەهۆی بڵاوەکردن پۆستیگ لە لاپەڕە فه‌یسبووكه‌گه‌ی خوەی.
سەرچەویگ مەدەنی لەناو شار خانەقین ئەرا شەفەق نیوز وت؛ سالم داوود، ک خەڵک شار خانەقینە، وجنسیەی بریتانی وەرگردیە، هەمیشە بەشدارە لە چالاکیەیل کۆمەڵایەتی و روشنهویری ناو خانەقین، وهۆی رویداوە ئەمنیەگان ئی دویايه‌ وپەلامارەیل داعش لە دەورگرد خانەقین و چەن قوربانییگ لە شارەگە، پۆستیگ لە لاپەڕەی فەیسبووک خوەی بڵاو کرد، لەناوی رخنە وە بەرپسەیل ئیداری و ئەمنی خانەقین گرت، وتوندوتیژی پۆستەگەی وەگورەی سەختی رەوشە ترسناکەگە بوی ک ئی چەن روژە خەڵک خانەقین دونێدەی، دویەشەو لە دیر وەختیگ خەوەر زیندان کردنی بڵاوەبویە ناو مەردم وچالاکوانەیل خانەقین، بڕیگ لەلیان دووارە پۆستەگەی داوود لە لاپەڕەیل خوەیان بڵاو کردن، وبڕیگش لە ژیر هاشتاگ ( ئازادی ئەرا سالم داوود) بڵاو کردن، ونیاز وەخۆپیشاندان دیرن لەوەرانوەر وەڕیەوبەرایەتی پۆلیس خانقین.
سه‌رچه‌وه‌گه‌ هەمیش وت؛ ک چەن کەسیگ لە خەڵک خانەقین پەیوەندی وە بەرپرسەیل کردنە لە هەوڵدانیگ ئەرا ئازادکردن سالم، وپەیمان وەپیان دریاگە ک سوو یەکشەممە لە دادگا واز لە سکاڵاگە بارن.
جی باسە؛ ک دیاری کردن ئیوارەی روژ جومعە ئەرا زیندانکردنی ک کەفێدە دوو روژ لە پشوو، هیشت فرەتر لەناو زیندان بمینێد.