شەفەق نیوز/ مەسرور بارزانی سەرۆک حکومەت هەرێم کوردستان ، ئمڕوو جومعە، لەوەخت دیدار جان ئیف لۆردیان وەزیر دەرەوەی فەڕەنسا وت: هەرێم رازی نیە وە دەسهاوردن کەمتر لە ماف دەستووری خوەی، لە چارەسەرکردن باوەتە گیرهاتگەیل ناوبەین هەولێر وبەغداد.
لە کۆبونەوەگە ک قوباد تاڵەبانی جیگر سەرۆک حکومەت ئامادەی بوی، باس رەوش عراق و ناوچەگە کریا، هەمیش گفتوگۆ لە ریەیل پشتگیری کردن پەیوەندیە مێژووەگان ناوبەین هەرێم کوردستان و فەڕەنسا، وەگورەی بەیاننامەی حکومەت کوردستان.
وەزیر دەرەوەی فەڕەنسا وت: سەردانەگەی ئەرا دووارەکردن پشتگیری وڵاتەگەی ئەرا هەرێم کوردستان تیەێد، وەتایبەت لە سای ئی رەوشەیل سەخت ئیسە، وتیش: فەڕەنسا ئامادەیە ئەرا پشتگیری کوردستان وە پسپۆڕە فەرەنسیەگان وەتایبەت لە چین کشتوکاڵی و هەمیش لەپشتسەرناین قەیران ئابووری ئیسە.
لە ناو کۆبونەوەگە، وەزیر دەرەوەی فەڕەنسا مکیسیگ پێشکەش کردە سەرۆک حکومەت هەرێم کوردستان ئەرا سەردان فەڕەنسا لە مەوقەی گونجیاگ، وچەوپیکەفتن ئیمانویل ماکڕۆن سەرۆک فەڕەنسا.
لەلای خوەییش سەرۆک حکومەت و جیگری رووشنایی خستنە بان ئەنجام گفتوگۆەیل وەگەرد حکومەت فیدڕاڵی، و هەوڵە وەردەوامەگان ئەرا چارەسەرکردن گرفتە گیرهاتگەیل ناوبەین هەردوگلا.
مەسرور بارزانی ئاماژەدا؛ ک کۆمەڵگای ناودەوڵەتی، وەتایبەت فەڕەنسا، توێەنن ده‌ور خاسیگ بڕانن لە نزیکەو کردن ناوبەین حکومەت هەرێم و حکومەت فیدڕاڵی، ئەرا کارکردن لە گرفتەیل وەگورەی دەستور.
سەرۆک حکومەتەگە وت: داواکاریمان وە پێچەوانەی دەستور نیە و کەمتر لە ماف خوەمان رازی نییمن.