نێچيروان بارزانى: ئه‌نفال يه‌كيگ له مه‌ترسيدارترين و دڕه‌نده‌ترين تاوانه‌يل مێژووه
شه‌فه‌ق نيوز/ نێچيروان بارزانى سه‌رۆك هه‌رێم كوردستان، باس له 32ه‌مين ساڵياد شاڵاوه‌يل ئه‌نفال كرد و وت: داواكاريم كۆمه‌ڵگاى ناوده‌وڵه‌تى تاوانه‌يل ئه‌نفال وه جينۆسايد بناسنێد و وه‌و خاتريشه گشت هه‌وڵيگ ئه‌يه‌يم.
بارزانى وت: له ياد سى و دوو ساڵه‌ى شاڵاوه‌يل به‌دناو ئه‌نفال، وه ريز و حورمه‌ته‌وه گشت ئه‌و قوربانيه‌يله ئه‌يه‌ريمنه هوير كه له‌و تاوانكارى و جينۆسايده گيان له‌ده‌سدان و سه‌ر ريز و نه‌وازش له‌وه‌رده‌م گيان پاك ئه‌وان و گشت شه‌هيده‌يل كوردستان چه‌منيم، سڵام و ريز ئه‌را خيزان و كه‌س و كار سه‌ربه‌زيان.
بارزانى زياتر وت: ئه‌نفال يه‌كيگ له مه‌ترسيدارترين و دڕه‌نده‌ترين تاوانه‌يل مێژووه ك ئافره‌ت، پياو، مناڵ و پير نه‌ناسيه و بيباكانه گشتيان وه‌ره‌و مه‌رگ وه‌جه‌م ڕاپيچ كردگه، وه‌ل ئه‌وه‌يشا ژينگه و ئاوه‌دانى ته‌خت كردگه و گشت شوونه‌واريگ ژيان ويران كرد و ته‌نيا له شاڵاو ئه‌نفال زياتر له 180 هه‌زار هاووڵاتى كوردستانى گيان سپاردن و جه‌مكوش و زينگ وه‌چاڵ كريان، بيجگه ويرانكردن هه‌زاران ئاوايى و ده‌يان شاروچكه‌ى كوردستان.
بارزانى هه‌ميش وت: له‌وه‌ختيگ ك ئمڕوو ياد ئه‌و ئه‌زيزه‌يله و گشت شه‌هيده‌يل كوردستان ئه‌كه‌يم، بايه‌سه گشت هه‌وڵيگمان بخه‌يمنه كار ئه‌را ئه‌وه‌گ وه‌هويچ شيوه‌يگ ريگه نه‌دريه‌ێد جاريگتر نه ملله‌ت كوردستان و نه هويچ ملله‌تيگ تر بان گووشه‌ى زه‌وى روێ وه‌ڕوێ ئه‌و تاوانكارى و جينۆسايده بوونه‌وه‌و بايه‌سيشه ده‌وڵه‌ت عراقى جوور ئه‌ركيگ ياسايى و ئه‌خلاقيى خوه‌ى، لايگ جددى له كه‌س وكار قوربانيه‌يل بيه‌ێده‌و قه‌ره‌بوويان بكا.
