شەفەق نیوز/ نێچیرڤان بارزانی سەرۆک هەرێم کوردستان، ئمڕوو جومعە، ستایش پشتگیری فەڕەنسا کرد ئەرا عراق و هەرێم لە دژایەتی تیرۆر.
بارزانی لە کۆنگرەیگ رۆژنامەوانی وەگەرد جان ئیف لۆردیان وەزیر دەرەوەی فەڕەنسا لە هەولێر ك ئاژانس شەفەق نیوز ئامادەی بوی وت: فەڕەنسا دەور گرنگیگ رانی لە هاوردنەوەی پەیوەندیەگان ناوبەین بەغداد و هەولێر دویای ریڤڕاندۆم، و هەمیش پشت عراق وکوردستان گرد وهیمان پشتگیری کەێد لە دژایەتی تیرۆر.
بارزانی، لۆردیان وە برادەر هەرێم کوردستان دانا، و هەمیش تاریف لە دەور شاند دوبلۆماسی فەڕەنسا کرد لە بەغداد و هەرێم. لەلای خوەییش لۆردیان وت: ئەیە هەیشتم سەردانمە ئەرا کوردستان، و یەکەمە ئەرا خوەرهەڵات ناوڕاس دویای کۆڕۆنا.
وتیش: ئیسە عراق و کوردستان هانە رەوش جیوازیگ، ئەراوە وتیمن بیلا لەورا بویمن ئەرا چەودیری لە رەوشەگان، و پاریس هاوکاری پزشکی پێشکەش کەێدە کوردستان ئەرا نواگردن کۆرۆنا.
هەمیش لە قسەگەی ئەرا سەرۆک هەرێم کوردستان وت: بایەسە وەلدانەو هاوکار بویمن لە دژایەتی تیرۆر و داعش، ئیوە فرە قوربانی داین لەبان خاک خوەدان، ئیوە پێویستی وە دەسمیەت دیرن چوونکە پێشوازی لە ئاوارەگان کردن، لە رووژەیل ئایندە فەڕەنسا هاوکاری رەسنێدە هەڵەبجە، و هەمیش فڕەنسا وە گەرد ئەڵمانیا ئیسە لە دهۆک دیرن پڕۆژەی ئاو خواردن جیوەجی کەن وەبایی ١٥ مەلیۆن یۆرۆ.
وتیش: فەڕەنسا هەر وەردەوامە لە پشتگیری کوردستان، وهەمیش خوه‌ندكاره‌یل کورد ک باوگیان لەبان دەس داعش شەهید کریایە، توێەنن ئه‌را خوه‌ندن باڵا بانه‌ فەڕەنسا.