شەفەق نیوز/ هەرێم ئاغا ئەندام دەسەی ئەمن و وەرگری لە پەرلەمان عراق، ئمڕوو جومعە، ئاشکراکرد لە دانوستان پێشکەفتگ ناوبەین وەزارەت وەرگری و پێشمەرگە ئەرا بڕیارداین لە میکانزم بەشداربوین هێزەیل کوردی لە پاراستن ئاسایش ناوچە دابڕیایەگان.
هه‌رێم ئاغا ئەرا ئاژانس شەفەق نیوز وت: هەردوگ وەزارەت وەرگری و پێشمەرگە توێژینەوەی پەسەنکریایەگان کەن لە بەشداربوین پێشمەرگە لە ناوچە دابڕیایەگان، و نەیهشتن بۆشایی ئەمنی وەدەس ئەندامەیل داعش، و دووپاتکرد ک نەبایەس هیچ شوونیگ لە عراق وەدەس داعش بوود، و خوەمان هەزاران کەرت لە هێزەیل فیدڕاڵی و حەشد شه‌عبی و پێشمەرگە دیریمن.
دیاریکرد ک دانووستانەگان جەخت خەنە بان ئارامکردن زیاتر لە ٥٠٠ کێلومەتر لە دەورگرد دیالە تا سنور ناحیەی رەبیعە لە نەینەوا، ک وە بۆشایی ئەمنی دانریەێد، و سەرچەوەی هەڕەشە و شوونەیل دزەکردن وەرەو پارێزگای دیالە وکەرکوک و سەڵاحەدینه‌، و راگەیان لە دروسکردن دەسەیلیگ ئەرا وەشکین ئەو ناوچەیلە و بردن ریکار وپلانەیل پێوست ئەرا گردین و ماڵینی.
دیاری کرد ک کۆبەنەوەیل ناوبەین وه‌زاره‌ت وەرگری و پێشمەرگە وەردەوامە ئەرا رێککەفتن لەبان میکانزم ئارامکردن ناوچە ئەمنیە ئاڵوزەگان ، لە ری دامەزرانن خاڵەیل وشکنین هاوبەش ناونی هێزە ئەمنیەگان و پێشمەرگە و حەشد، یا هێزەیل هاوبەش ئەرک ماڵین ئەو ناوچەیلە هەڵگرێد.
ئاماژەیە ک هێزەیل پێشمەرگە و ئاسایش لە ناوچە دابڕیایەگان کیشانەو دویای هەڵمەتیگ سەربازی لەلایەن هێزە عراقیەگان وەپشتگیری حەشد شەعبی لە ناوڕاس مانگ تەشرین یەکەم ساڵ ٢٠١٧ لە پشت ریفڕاندۆم سەروەخوەیی ک هەرێم کوردستان ئەنجامی دا لە ٢٥ ئەیلول لە خود ساڵەگە.
لە شوون ئه‌و کیشانەوە، ریخریاگ داعش پەلامارەیلی خەسەوکرد لە روبەرە ئەمنیە خاڵیه‌گان ناوبەین پارێزگایل دیالە وکەرکوک ونەینەوا، لە وەکارهاوردن ئەو شوونەیلە ک پێشمەرگە پڕیانەو کردوید.