شەفەق نیوز/ جادەیل شار هەولێر پایتەخت هەرێم کوردستان، ئمڕوو سێشەممە، چووڵ دیاردا لە ماشین و ئایەم وەگەرد وەجیهاوردن قەیەغەی هاتووچگن ئەرا نواگردن لە بڵاوبەین ڤایڕۆس کۆرۆنا.
پەیامنێر ئاژانس شەفەق نیوز خەوەردا؛ ک بازاڕەیل ناوڕاس هەولێر بەسیان، وجادەیلیش لە ماشینەیل چووڵەو بوین. و ژمارە فرە کەمیگ لە مه‌ردم ناو جادەگان دیارکەفتن، بەشیگیان وە پایسکل هاتیان ئەرا ئەو شوونەگ خوازن.
قەیەغەگە لە نیمەی شەو دووشەممە/ سێشەممە دەسکردەپی، لە ناو بڵاوبوین فره‌ی پۆلیس و ئاسایش و ئەو کەسەیل ئاسایشه‌ ك چەودیری لە جوور قەیەغەگە كه‌ن.
وەڕیەوبەرایەتی ناوخۆیی هەولێر، رووژ یەکشەممە، ئەرا نواگردن وبڵاوبوین مەترسیدار ڤایڕۆس کۆرۆنا بڕیار چەسپانن قەیەغەی هاتووچگن گشتگیر دا، ئه‌را چوار رووژ ولە ماوەی ساعەتەیل رووژ.
لە بڕیارەگە وەخشین دریا وه‌ نانەواخانە و بازاڕەیل خواردەمەنی لەناو گەڕەکەگان و دوکانەیل سەوزە و میوە و عەلوەگان، وەگەرد ئاسانکاری ئەرا ماشینەیل بارکردن چشت خوارەمەنی، ورەسانن دەرمان و دەرمانخانە خەفەرەگان و ماشینەیل فروشتن گاز ماڵان و کۆمپانیایل پەیوەندی و ماشینەیل بار سوتەمەنی و کۆمپانیایل خواردەمەنی.
لەوەخت دیارکەفتن پەتاگە،هەژمار گشتی تووشهاتگەیل وە ڤایڕۆس کۆرۆنا لە هەرێم کوردستان رەسیە ٥٩٠٤ ، لەلیان ١٣٢٢ لە هەولێر، ٤٢٢٩ لە سلێمانی، ١٢٠ لە هەڵەبجە.
هەژمار مردگەیل لەوەر پەتاگە لە هەرێمەگە رەسیە ٢٠٠ کەس، لەلیان ٢٦ لە هەولێر، ١٧٠ لە سلێمانی ، ٤ لە هەڵەبجە.