شەفەق نیوز/ ئمڕوو یەکشەمە، سەرچەوەیگ ئەرا ئاژانس شەفەق نیوز لە قەزای خانەقین خەوەردا لە تەواوکردن خەسەخانەیگ تایبەت ئەرا تووشهاتگەیل پەتای کۆڕۆنا لە شار خانەقین، وەرەنج و خۆبەخشانەی خەڵک شارەگە.
سەرچەوەگە هەمیش وت: ئمڕوو، خەسەخانەگە وە دەور ٥٠ شەوخەف و شیوەی دروسکردن نوویگ تەواوبوی، ئەرا کەرەنتین گومان تووشهاتگەیل کۆڕۆنا.
لە لای خوەییش دلێر حەسەن سایە قایمقام قەزای خانەقین، ئمڕو، لە ماڵپەڕ قایمقامیەت قەزای خانەقین لە فەیسبووک راگەیان ک بونیاد خەسەخانەگە دریادەس وەڕیەوبەر خەسەخانەی گشتی خانەقین، ئەرا پڕەوکردنی وە پێویستە تەندروسیەگان، تا ئامادە بوود ئەرا وەرگردن بیمارەیل لە رووژەیل هاتگ.
قایمقامەگە هەمیش رێز ودەسخوەشی کرد لە گشت خۆبەخشەیل ک بوینە هووکار دروسکردن ئی خەسەخانە وە شیوەیگ نوو.
سەرچەوەیگ تەندروسی لە خەسەخانەگە ئەرا ئاژانس شەفەق نیوز وت: شایەت ئی خەسەخانەی نووە وەکارباێد ئەرا ئەوانەگ گومان لە تووشهاتنیان بوود، تا ئەوەنە ئەنجام تاقیەگان تیەێدەو، چوونکە ئەگەر بوودە خەسەخانەیگ ئەرا کەرەنتین تووشهاتگەیل وە ڤایڕۆس کۆڕۆنا، بڕیگ پزشک و کادر و پێویستی تەندروسی خوازێد، ک هیمان لە قەزاگە ژمارەیگ وەگورەی ئەوە نیە، بەڵکم فرە لە بار خەسەخانەگە سوکەو کەێد، و هەمیش ئەرا ئایندە دویای لەناوبردن پەتاگە بوودە هووکار خاسیگ ئەرا وەری خستن بیمارەیل شارەگە.
جی باسە؛ وەگورەی ئاشکرا کردن راگەیانن خەسەخانەی خانەقین لە ئاماریگ تووشهاتنەگان شارەگە، ک دویاترین ئاماری لە رووژ جومعەی گوزەیشتە بوی ک ئاماژەداگە وە تۆمارکردن ١٣ تووشهاتگ وەکۆرۆنا دووانیان ئەرا کادر پزشکی و تەندروسی بوی ویەکیگ ئەرا کارمەنیگ لە خەسەخانەگە، وئەواکانیش ئەرا خەڵکەگە بوی. یه‌ له‌وه‌ختێگه‌ ك هیمان تووشهاتگەیل رەوانە شار بەعقوبە کریەن.