( سێ چین لە مردم هەس: ئەوانیگ هانە بان، وئەوانەیگ هانە خوار، وئەوانەیگ کەفن)، وەی قسە فیلمەگە دەسکەێدەپی، لەبنەمای چینەیل کۆمەڵگا لە ژیان راستەقینە.
فیلمەگە لەناو زیندانیگ چیرۆکەگەی و وینەگانی تەواوکەێد، بەڵکم زیندانەگە جوور ئەوانە نیە ک ناسیمنەی، ناو ئەو زیندانە لەفیلمەگە نریاگە وە چاڵ، جوور تەلار بەرزیگە وە زیاتر لە ٣٠٠ قات، لەناوڕاس گشت قاتەگانی بووشاییگ هەس، لەی بووشاییە روژانە سەکویگ تێەێدە خوار، خواردن هابانی، ئەو خواردنە وەئەندازەیگ نریاگە ک بەش گشت کەسەیل ناو زیندانەگە بکەێد، وەمەرجیگ ک هەر کەسیگ وەگورەی ژیانەگەی بخوەێد، ک ئەگەر زیاتر لە بەش خوەی خوارد، واتە بەش کەسیگ تر لە قاتیگ خوارتر خواردگە، لەهەر قاتیگ دوو کەس زیندانکریاگە، ئیجا سەکوەگە وەچوڵی چوودەبان، هەر مانگیگ شوون ئەوانەگ هانەناو زیندانەگە ئاڵشت بوود، شایەت ئمڕو کەسیگ لە قاتە بانینەگان بوود، ک خواردن وەشیوەیگ خاستر و فرەتر وەپی رەسێد، ئەو خواردنە ک لە قات یەکەمەو تیەێد پڕی لە جواروجور خوەشترین و وەتامترین خواردنە، وشایەت لە قاتە خوارینەگان بوود، ک تەنیا جیماگەی خواردنەگە ئەرای بڕيسێد، یا تەنیا قاوەگان وەچووڵی بڕەسێد، ک کەسیگ لەقاتە خوارینەگان ئەوزەڵ نیەکەێد، چوونکە لەوەرسگی مرێد.
سیستم چاڵەگە ری نیەێد وە کەسیگ لەبان سەکوەگە خواردنیگ بوەێد ولەقاتەگەی خوەی هەڵیبگرێد، چوینگە ئەگەر کەسیگ وەیجوورە کرد، پلەی گەرمی ئەو قاتە یا فرە سەردەو بوود تا بوونە یەخ، یا فرە گەرمەو بوود تا بونە خوەڵەکو.
هەر زینداییگ دەرفت ئەرای هەس لەمەوقەی هاتنی ئەرا ناو ئی چاڵە، تەنیا یەک چشت وەل خوەیا بارێد.
گۆرینج پاڵەوان فیلمەگەس، ک ئیڤان ماساجی ئەکتەرە کەتەلۆنیەگە دەورەگەی بازی کەێد، وەختا چوودە ناو چاڵەگە، کتاویگ پەسەن کەێد تا وەل خوەیا بوەێد، تا خوەی دوونێد لەناو قاتیگ ناوڕاسی لە خانەی ٤٨ ، وەگەرد پیرەمەردیگ، خاوەن ئەزمونە لەناو ئی چاڵە، ک چەقو تیژیگ وەل خویا هاوردگە.
گۆرینج تەقەلا دەێد بڕوایی وە کەسەیل لە قاتەیل بان بارێد، تا هەرکەسێگ وەگورەی ژیان خوەی بخوەێد، تا گشت کەسەگان ناو زیندانەگە ژیان بکەن، وکەسیگ ناچار نەوود کەسیگ تر بکوشێد، و له‌وەر ورسگی لە گوشتەگەی بخوەێد، بەڵکم ئەوانەیگ هانە بان گوش نیەگرن، و پاپای کەسیگ لە خوار نیین، هەرچن خوەیانیش ئەرا قۆناغیگ تر، کەفنە خانەیل خوارگ.
وه‌ شیوەیگ لە شیوەگان، فیلمەگە بۆچونیگ ئەرا سیگمۆند فڕوێد شیەو کەێد، جوور، ( ئەو، من، من باڵا)، ولەشیوەیگ تر، چمان باس عیسای مەسیح کەێد، وەختا تەقەلای بڕواهاوردن وەمەردم کەێد، وە قسەی بیرمەندانە، و بەڵگەی دانایی.
سکو The platform فیلمیەگە کەم خەرجی لە بەرهەمەگەی، یەکەم جار هەل کریا لە فیستڤاڵ تۆرینتۆی سینەمایی ناودەوڵەتی لە ساڵ ٢٠١٩، گاڵدیر گاستیلۆ دەرهێنەرەگەی خەڵات دەنگدان جەماوەر وەرگرد، و فیلمەگە لە دەقیگ شانۆیی بریاگە ئەرا دوو نووسەر دەێڤید دیسۆلا و بیدڕۆ ریڤێڕۆ.