شەفەق نیوز/مەردم هەمیشە سەرسام بوون لە ئەو تەکنۆڵۆژیا ک لە بەرهەمهاوردن فیلمەگان وەکار هاوریاگە، وجوانی وینەگان و شیوەی تۆمارکردن و شوینەگە وبڕیگ جوانکاری لە دەنگ و رەنگ بوودە سه‌رنج کیشانیگ ئەرا تەماشایان، ک بڕیگیان تەنیا کارەیل شیوەییە تا دیار کارەگە وە مەزنتر بیەێد، بەڵکم ئەو فیلمەیلە ک چەسپیەنە ناو هویر ئایەمەگە، خوەی ئەو فیلمەسە ک خاوەن چیرۆکیگ قویل وسیناریۆ وەهێزیگە، ک وەل روزگارەو کاڵەو نێوود.
لەی راپۆرتە باس چەن فیلمیگ کەیمن ک چیرۆک لەناوی پاڵەوانە سەرەکیەگە بوی، ک هێشت کارەگە سەربکەفێد.
وتار شاه The King’s Speech
فیلمیگ دڕامای مێژووی بریتانیە، لە بەرهەم ساڵ ٢٠١٠، لە دەرهێنان تۆم هوبەر، وپاڵەوانی کۆلین فێرس و هیلینا بۆنهام کارتەر و جیڤری راش و مایکڵ جامبون وگای بیرس، ئی فیلمە خەڵات جەماوەر وەرگرد لە فیستیڤاڵ تۆرینتۆ ٢٠١٠ ، وچوار خەڵات ئۆسکار.
فیلمەگە باس شاه جۆرج شەشم کەێد ( کۆلین فێرس) ک رەسێدە تەخت حکومڕانی لە بریتانیا، دویای وازهاوردن برا گەوراگەی، شاه جۆرج بڕ بوی، وە ئاسان قسە وەپی نەکریاگ، تایبەت لەوەختیگ بخوازێد ئەرا مەردم قسە بکەێد، ک وەردەوام خەجاڵەتی کردیاد.
شاه خوەیو هاوسەرەگەی مینەی چارەسەرییگ کەن ئەرا ئی گیچەڵە، تا دکتۆر لیونێل لۆگ دویننەو، لە نووسینگەی سادەیگ کارکەێد، وشیوەیگ نائاسایی، وەلی توینست رزگار شاه لەو گریە بکەێد.
نیمەی شەو لە پاریس Midnight in Paris
فیلمیگ کۆمیدی فانتازیا، لە نووسان و دەرهێنان وودی ئاڵان ساڵ ٢٠١١،جویلەگەی لەناو شار پاریس بوود، ک باس چیرۆک سیناریۆ نووس گیل بیندەر کەێد، وەختا ناچاربوود لەورانوەر پەیوەندیە ناگونجیاگەی وەل دەزویرانەگەیەو و ئامانجەیل جوراجوریان، ئەوەگ هەمیشە خراوەو بوود، دویای گەشتیەگانی لە ناو روزگارەو، لە گشت نیمە شەویگ.
فیلمەگە لە پاڵەوانی ئۆین ویڵسۆن و رایچڵ مکئادمیز و کاسی بیتز، وئەدریان برۆدی، و کاڕڵا برۆنی، و ماریۆن کوتیار، و مایکڵ شین، لە فیستیڤاڵ کان سینەمایی ئەرا یەکەم جار هەل کریا لە ساڵ ٢٠١١، ئیجا لە ئەمریکا لە ئایار ٢٠١١ .
ئی فیلمە تاریفیگ لە رەخنەگرەیل سینەمایی دی، لە یەکەم دیاریی، و خەڵات خاسترین سیناریۆ رەسەن وەرگرد، وخەڵات گۆڵدین گلۆپ ئەرا خاسترین سیناریۆ لە ساڵ ٢٠١٢ .
جانگۆ ئازاد Django Unchained
ئی فیلم ئەمریکیە کەفێدە شوین یەکیگ لە کوەیلە ئازادکریایەگان ( جیمی فۆکس)، ک لە ئەمریکا گڕ خوەێد وەل نیچیروان خەڵاتەگان (کریستۆف واڵتز) لە ئەرکیگ ئەرا رزگارکردن هاوسەرەگەی ( کیری واشینتون) ، وەگەرد سەرکاڵ جەوەڵییگ خاوەن کاریزما ( لیوناردۆ دی کابیریۆ).
فیلمەگە تاریف لە رەخنەگرەیل سینەمایی وەرگرد، وسەرکەفت لە دوو خەڵات ئۆسکار، ئەویش خەڵات خاسترین ئەکتەر هاوکار بوی ئەرا ( کریستۆف واڵتز)، و خاسترین نووسەر سیناریو رەسەن ئەرا (کۆنتین تاڕانتینۆ) بوی، وهەمیش ئی فیلمە خەڵات گۆڵدین گڵۆپ وەرگرد جوور خاسترین سیناریۆ.
خوەی Her
ئی فیلمە خەیاڵی زانستی و رۆمانسیە ساڵ ٢٠١٣، لە نووسان ودەرهێنان سپایک جۆنز، وپاڵەوانی خواکین فینیکس، ئیمی ئادەمز، رۆنی مارا، ئۆلیڤیا وایڵد، وسکارلیت جۆهانسون، یەکەم جا لە فیستڤیاڵ سینەمای نیویۆرک هەل کریا لە تەشرین یەکەم ٢٠١٣ .
چیرۆک ئی فیلمە هادەور سیودۆر، پیاو تەنیایگە لە دویا قۆناغ جیابوینی لە هاوسەرەگەی، بڕیار دەێد سیستم وەکارخستن نوو ( ئۆ ئیس وەن) بسینێد، ک لەو وەختە دەرچگ، ویەکجا خوەی دوینێد جوور عاشقیگ ئەرا دەنگ مایەی ئەو سیستمە، وفرەترین وەخت وەلیەو گوزران کەێد، وپەیوەندییگ وەلیەو دروس کەێد، وناچار بوود وە هەست دووسی خوەی رەفتار بکەێد.
پیاوە باڵندەگە Birdman
ئەیە فیلمیگ ئەمریکیە لە کۆمیدیای سیا، لە بەرهەم ساڵ ٢٠١٤ ، لە دەرهێنان ئەلیخاندڕۆ گۆنزالیز ، ولەپاڵەوانی مایکڵ کیتۆن، ئیما ستون، ئیدوارد نۆڕون، ئەندریا ریسبورۆج، ئیمی رایان، زاک گالیڤیاناکیس، و نەعومی واتس.
چیرۆک فیلمەگە گڕخوەێدە دەور ریگان تۆمسون ( مایکڵ کیتۆن) ک ئەکتەریگە لەهویرەو چگە وەناوبانگەوبوی لەوازی پاڵەوانە توانادارەگە، و پیاوە باڵندەگە، لە زەنجیرە فیلمیگ وەناوبانگ، وخوازێد روژەیل سەرکەفتنی بارێدەو، وەختا دەسکەێدە نووسانن و دەرهێنان و ئەکتەر پاڵەوانی لە شانۆیگ نوو.
پیاوە باڵندەگە تاریف فرەیگ لەلایەن رەخنەگرەیل سینەمایی وەرگرێد، و دانریەێد وەیەکیگ لە خاسترین فیلمەگان ساڵ ٢٠١٤ ، لە لایەن بڕیگ رێکخراو، جوور پەیمانگەی فیلم ئەمریکی، و ئەنجومەن نیشتمانی ئەرا دووارە تەماشا، فیلمەگە خەڵات ئۆسکار ٨٧ وەرگرد جوور خاسترین فیلم وخاسترین دەرهێنەر وخاسترین سیناریۆی رەسەن و خاسترین تۆمار سینەمایی.