شەفەق نیوز/خوداداد عەلی کەریم سۆرەمەیری ، لە ساڵ ١٩١٢ لە ئاوای تەفرەقەی عەڵەمدار پەیا بویه‌. ئەو ئاوای بویچگە ئیسە گەڕەکیگە لە شار خانەقین، هەر لە گەنجی خوەیەو خوەشی لە مەقام و گورانی کوردی هاتگە، لە ساڵ ١٩٥٦ فازڵ شاکر ك پیاویگ هونەردوس و ئەفسەر بویە، خوداداد وەل خوەیا بردگە ئەرا بەغداد، چوینەسە ئێزگەی بەغداد، لە بەشە کوردیەگەی، لەورا وەدەنگە زەڵاڵەگەی چەن مەقامو ئاوازیگ لە فلوکلۆر خانەقین ئەرای تۆمار کردنە، جوور (مەقام بەیات، حیجاز، قەتار، ئاواز ئەڵوەن، ئای ئای باجڵانی، ئەڵاوەیسی)، ئیجا لە تەلەفزیۆنیش دوو برهەم تۆمارکریاگ دیرێد، ئاواز ئەڵوەن، و مەقام ئای ئای.

خوداداد عەلی، لە مناڵی لەلای مەڵایگ لە خانەقین تا سێ ساڵ خوەنستیە، تا هوکارەی خوەنستن و نویسان بویە.

سێ ژن هاوردیە، و دوو کوڕ و دوو دویەت لەلیان ئەرای بویە.

هونەرمەن خوداداد عەلی خاوەن  چنه‌ دەنگیگ خوەش داشتیه‌ ك  هیمان هەنای ئاواز ئەڵوەن ژنەفێد هەست کەێد دەنگ شارەگە هاناوی، و هاژەی ئەڵوەن چمانی لە ئاوازەگەو تیەێد.

خوداداد عەلی پیاویگ دڵسوز و رویخوەش بویە،  هەمیشە لاینگر شۆڕش ئەیلول بویە، لە ساڵ ١٩٦٣ رژیم بەعس گردنەی، تا شەش مانگ لە بەندیخانەی خانەقین گیری هاوردن، و لەساڵ ١٩٧٤ هەمیش گردنەی، تا چەن مانگیگ لە ئەمن عامە لە بەغداد زیندانی کردن.

خوداداد عەلی، فرەتر خەریک کار کشتوکاڵی بویە، وەڕەنج شان خوەی ژیاس .

خەڵک خانەقین فرە دووسی دێرن  وهەمیشە شانازی وەپیەو کەن، ئەراوە هونەرمەن دەسڕەنگین کازم حاجی عەلی، لەبان ئەرک خوەی پەیکەریگ ئەرای دروس کرد له‌ کنار ئەڵوەن نریا.

خوداداد عەلی لە روژ ١٩/٢/١٩٨٧ دەنگ خوەی ئەرامان هیشتە جی، وماڵئاوایی یەکجاری کرد، لە مەزار عەڵەم دار، دویاترین خەفتنەگەی کرد.