ئەنجومەن سەروەری گواستنەوەی سودان واژوو کرد لەبان پڕۆژەی یاسایگ ک حکومەتەگە لە نیسان گوزەیشتە بڕیاری داگە وە تاوانبارکردن خەتەنەی دویەت و سزادان کردەوەگەی وە زیندانی ئەرا ماوەی سێ ساڵ وەگەرد چەسپانن سزای پویلی.
بەیاننامەی وەزارەت داد سودانی وت: ئەنجومەن سەروەری لە دانیشتنەگەی ژمارەیگ یاسا واژوو کرد و پویچەڵ مادەیلیگ لەناوی کرد ، لەلیان بەشیگ لە ئەو یاسایلە ک لە ئەرزش وکەرامەت ژن داگرێد جوور تاوان خەتەنەی دویەت.
لە دەق مادە خاسەوکریایەگە هات: هەرکەسیگ ئەندام زاوزوی مایە لاوەێد یا بشیونێد و شیوەیگ گشتی یا نیمه‌ لە کار بخەێدەی ، چ لەناو هەر خەسەخانەیگ بوود یا ناوەندیگ تەندروسی یا لە هەر شوونیگ تر؛ سزادریەێد وە زیندانی ئەرا ماوەیگ لە سێ ساڵ رەدنەکەێد و وە سزادان پویلی.
یاساگە سزای هەرکەسی دەێد ئەو کارە بکەێد چ پزشک بوود یا ژنە پزشک یا سەردانکەر تەندروسی.
ئەویش لەو چاکسازیە هات ک ئەنجومەن سەروەری واژوو کرد وە بڕیارداین وە ماف ژن لە بردن مناڵەیلی لە مەوقەی گەشت ئەرا دەیشت سودان.
لەلای خوەییش، عەبدولڵا حەمدوک سەرۆک وەزیران باس خاسکردنەگە لە یاساگان کرد وە گام گرنگیگ لە ری خاسەوکردن سیستمە دادوەریەگە ئەرا ئەنجام داین دروشم شۆڕشەگە.
حەمدوک پەیمان دا وە وەردەوامی نووڕستن و خاسەوکردنە یاساییەگان تا چارەسەرکردن گشت شیواننەگان لە سیستم یاسایی سودان تەواو بوود.
رێکخراو یونیسێف سەروە نەتەوە یەکگرتوەگان ئووشێد؛ سودان لەو دەوڵەتەیەسە ک رێژەی خەتەنەی مایە لەتی بەرزە و ٨٧ لە سەد لە ژن و دویەتە سودانیەگان لەی رەفتارە زیان دوینن.
وتیش؛ بەڵگە هەس لەبان کەمەوبوین رێژەگە لەناو دویەتە بویچگەگان، دویای ئەوە ک رێژەگە ٣٧ لەسەد بوی لە ساڵ ٢٠١٠ ، داوەزیا ئەرا ٣١،٥ لەسەد لە ساڵ ٢٠١٤ .