شه‌جه‌ریان وه‌ل هونه‌رمه‌نده‌یل كورد له ئه‌مه‌ریكا كۆنسێرت سازئه‌كا
دويه‌مین زنجیره كۆنسێرت گورانیچڕ ناودار ئيرانی محه‌مه‌د ره‌زا شه‌جه‌ریان وه ناونیشان "دلبر سنم" وه هاوڕێیه‌تی موزیكزانه‌یل جوان كرماشانی ته‌هموورس پوورنازری وه ئامێر تار و سۆهراب پوورنازری وه ئامێر كه‌مانچه و هه‌ميش ژه‌نیار كورد هه‌ژار زه‌هاوی وه ئامێر ده‌ف، وه‌ل ئۆركسترای ئامێره‌يل نوو ئه‌مه‌ریكا له 13 شوبات/ فه‌برایه‌ر 2013 له شار شۆرێنج كانتی وڵات ئه‌مه‌ریكا ده‌سوه‌پێ ئه‌كا و تا سێیه‌م رووژ نه‌ورووز له شار بێركلی كووتایی وه‌پێ ئه‌يه‌ێ.
یه‌كه‌مین زنجیر ئی كۆنسێرته‌يله پاییز ئمساڵ له شاره‌یل تۆرێنتۆ له وڵات كه‌نه‌دا ده‌س وه‌پێكرد، دوياتر له شاره‌یل مۆنتراڵ، ڤه‌نكۆڤێر و كۆل گری ئی وڵاته كووتایی وه‌پێهات.
له به‌ش یه‌كه‌م كۆنسێرت "دلبر سنم" پارچه موزیك "نوور" وه ئاوازدانه‌ری ته‌هموورس پوورنازری و هه‌ميش وه‌يه‌كه‌و‌ژه‌نین گرووپ و بوداهه خوه‌نین محه‌مه‌د ره‌زا شه‌جه‌ریان له مایه‌ی نه‌وا و به‌یاتی زه‌ند وه شعر شاعره‌یل ناودار ئيرانی فه‌ره‌یدوون موشیری و هووشه‌نگ ئێبتێهاج و وه‌يه‌كه‌و‌ژه‌نین ئامێره‌یل تار، كه‌مانچه، زه‌رب و ده‌ف پێشكه‌ش ئه‌كريه‌ێد.
له به‌ش دويه‌میش پارچه موزیك "سه‌فه‌ر"، بوداهه‌ژه‌نین ئامێره‌یل باربه‌د، دڵ و دڵ، شه‌هنه‌واز، وه‌ل شه‌هبانگ و واتێردرام، تێكه‌ڵاوێگ له موزیك ئيرانی، ئیرله‌ندی و بلووگرێس ئه‌مه‌ریكی پێشكه‌ش ئه‌كريه‌ێد.
له به‌ش دويه‌میش پارچه موزیك "بر سماع" وه ئاوازدانه‌ری سۆهراب پوورنازری، به‌رهه‌مێگ ئه‌ڕا ئۆركسترای ژێیی و ته‌نبوور و له به‌ش چوواره‌م ئی كۆنسێرتيشه گورانییه‌یل "دلبر سنم"، "زخم" يانێ "برین"، "له عشق و له عیش وتن" وه ئاوازدانه‌ری ته‌هموورس پوورنازری و سۆهراب پوورنازری وه هاوكاری وه‌ل ئاوازدانه‌ری وه‌توانای ئه‌مه‌ریكی ده‌یڤید گارنێر وه شعر شاعر پيشه‌نگ ئيرانی نزامی گه‌نجه‌وی، مه‌ولانا، سه‌عدی و باباتاهر هه‌مه‌دانی پێشكه‌ش ئه‌كريه‌ێ.
له كۆنسێرت "دلبر سنم" ك له لایه‌ن كۆمپانیای Mystic World Music وه‌ڕێه‌وئه‌چێ، هونه‌رمه‌ندانێگ له شه‌ش وڵات جه‌هان وه‌ل ئامێره خوڵقێنرياگه‌گان محه‌مه‌د ره‌زا شه‌جه‌ریان له شان ئامێره كوترياگه‌گان كۆنسێرت پێشكه‌ش ئه‌كه‌ن.
ئه‌ندامه‌یل كۆنسێرت "دلبر سنم" بریتین له: محه‌مه‌د ره‌زا شه‌جه‌ریان ـ گورانیچڕ، فیلیپ برازینا ـ ژه‌نیار دڵ و دڵ، ئیۆن بۆتمێر ـ ژه‌نیار دڵ و دڵ ئاڵتۆ، شین كاراسۆ ـ ژه‌نیار شه‌هنه‌واز، جوان دمارس ـ ژه‌نیار شه‌هنه‌واز، ئاندره گۆرباتنكۆ ـ ژه‌نیار شه‌هبانگ، سۆهراب پوورنازری ـ ژه‌نیار تار، ساغه‌ر و باربه‌د، سۆهراب پوورنازری ـ ژه‌نیار كه‌مانچه، ته‌نبوور و شه‌هرئاشووب، شه‌هاب پاره‌نج ـ ژه‌نیار ئامێره كوترياگه‌گان، هه‌ژار زه‌هاوی ـ ژه‌نیار ئامێره كوترياگه‌گان و رۆبین وارسی ـ ژه‌نیار ئامێره كوتركرياگه‌گان.
أ. ج
PNA
