فیلمێگ كوردی له فستیڤاڵ نه‌ته‌وه‌یی وارش خه‌ڵات كريا
كوڵه فیلم ئه‌زموونی "سكوت بركه‌ها" بانێ "بێده‌نگی تاڵاوه‌يل" له ده‌رهاوردن سینه‌ماكار جوان مه‌ریوانی خاتوو فاتمه ده‌ستمه‌رد، چه‌ن رووژ له‌يه‌و وه‌ر جوور ته‌نیا فیلم كوردی له به‌ش پێشبڕكێ هه‌فته‌مین فستیڤاڵ ناونه‌ته‌وه‌یی فیلم واڕش له شار بابول له پارێزگای مازه‌نده‌ران له باكوور كوردستان نمایشكريا و پله‌ی دويه‌م خاسترین كوڵه فیلم مه‌ته‌ڵ ئی فستیڤاڵه وه‌ده‌سهاورد و له لایه‌ن ئه‌ندامه‌یل ليژنه‌ی ناوژیوانه‌وه ته‌ندیس فستیڤاڵ و تابلۆی فه‌خری به‌خشريا پێ.
ئه‌ندامه‌یل ليژنه‌ی دادوه‌ری حه‌فته‌مین فستیڤاڵ ناونه‌ته‌وه‌یی فیلم "واڕش" بریتی بوين له: سینه‌ماكار ناودار ئيران خوسره‌و سینایی، محه‌مه‌د عه‌لی سه‌جادی، به‌هرام عه‌زیمی، ناسر هاشمزاده و خاتوو مینوو فه‌رشچی.
ئی فستیڤاڵه وه به‌شداری بڕێگ كوڵه فیلم له سینه‌ماكاره‌يل سه‌رتاسه‌ر ئيران له چه‌نه‌ها به‌ش جووراوجوور، له‌وانه: مه‌ته‌ڵی، دیكۆمێنتاری، ئه‌نیمه‌یشێن، ئه‌زموونی، به‌ش مازه‌نده‌ران، و به‌ش تایبه‌ت وه دروشم ساڵ ئيران ئه‌را ماوه‌ی هه‌فته‌یگ له شار بابول وه‌ڕێه‌وچی.
كوڵه فیلم "بێده‌نگی تاڵاوه‌يل" له دويایین به‌شداری خوه‌ی له به‌ش پێشبڕكێ 12مین خول فستیڤاڵی ناونه‌ته‌وه‌یی فیلم "خۆڕاگری" له شار كرمان له ئيران نمایشكريا و له به‌ش پێشبڕكێ كوڵه فیلمه‌یل سینه‌مای ئيران ئی فستیڤاڵه له لایه‌ن ئه‌ندامه‌یل ليژنه‌ی ناوژیوانه‌وه له‌وحه‌ی فه‌خری و خه‌ڵات نه‌قدی خاسترین كوڵه فیلم دويه‌م به‌خشريا پێ.
ستاف ئاماده‌كردن كوڵه فیلم ئه‌زموونی "بێده‌نگی تاڵاوه‌يل" :
ده‌رهاه‌ر: فاتمه ده‌ستمه‌رد
نويسه‌ر سیناریۆ: فاتمه ده‌ستمه‌رد
وێنه‌گر: حشمه‌ت نارنجی
ده‌نگدانه‌ر: ئاره‌ش ره‌سافی
مونتاژ: ئاره‌ش ره‌سافی
ئه‌كته‌ره‌يل: شیما ئه‌مجه‌دی و بیتا خدری.
به‌رهه‌مهاوه‌ر: مه‌نسوور چه‌مه‌نی
ج
PNA
