فێستیڤاڵ "هوورە و تەمويره‌" لە شار شاباد یا ئسلام ئاوای رووژئاوا سەر وە پارێزگای کرماشان وەڕێه‌وچی. ئەو فێستیڤاڵە لە هۆڵ شارەوانی ئەو شارە و وە بەشداری شومارەیگ وەرچه‌و لە نیشته‌جايه‌یل کرماشان وەڕێه‌وچی، ک تایبەت کرياويد وە یادکردنەوەی هونەرمەنده‌یل کورد "سەی قولی کەشاوەرز" و "سەی تاهر وەیسی" لە بوارەیل هوورەچڕین و تەمويره‌ژه‌نين.

لە بەشێگ تر ئەو رێورەسمە عەلی ئەکبەر مورادی، هونەرمەند کورد لەباره‌ێ گرنگی خوه‌نستن و نويسانن وە زووان داڵگی قسە ئه‌ڕا بەشداربويه‌يل کرد و وت: لەبڕێگ لە ناوچەیل کوردستان بنەماڵەگان وە زووان فارسی قسە وه‌ل مناڵەگانیان کەن ک نادێ ئيچنه‌ بوود. ئەرک گشت بنەماڵەیگە لە کرماشان ک وه‌ل مناڵەگانیان وە کوردی قسە بکەن و خوه‌نستن و نويسانن وە زووان کوردی هووكاره‌يان بکەن.

عەلی ئەکبەر مورادی هەميش داواکرد حکوومەت بودجەی تایبەت ئه‌ڕا گەشەوه‌پێداين مۆسیقا و هونەر نەتەوەیل ناو ئيران دابین بکا.

لە ناوچەیل ئیلام و کرماشان و دەورووەر سنە ئی شێوە گورانییە باوە وە زاراوەی کوردی خوارگ. نە مۆسیقا وه‌ليا ژه‌نيه‌ێد و نە ریتمیش ديرێ. ناوەڕوک شعره‌گانی ئه‌كريه‌ێد له‌باره‌ێ پاڵەوانی، دڵداری، خه‌مباری و پیری بوود.

تەمويره‌يش سازێگ تایبەتییە ک زیاتر لە ناو په‌يڕەوه‌یل ئایین یارسان ئه‌ڕا ژەنین مۆسیقای ئایینی وەکار بريه‌ێد.

rudaw

ا. ج