كرماشانييگ خه‌ڵات خاسترين وێنه‌گر سان سێباستییان وه‌ده‌سهاورد
2012-10-06 13:52:46
وه‌رز كه‌رگه‌ده‌ن له‌ده‌رهاوردن سینه‌ماكار ناودار كورد به‌همه‌ن قوبادی و له وێنه‌گردن سینه‌ماكار جايه‌ڵ وجوان كورد تووره‌ج ئه‌سڵانییه.
فیلم سینه‌مایی "وه‌رز كه‌رگه‌ده‌ن" شه‌شه‌مین به‌رهه‌م به‌همه‌ن قوبادییه ك له‌تێ چه‌نه‌ها ئه‌كته‌ر ناودار جه‌هانی به‌شداری له‌تێ كردنه له‌وانه بهروز وسووقی ئه‌كته‌ر ناودار سینه‌مای ئيران، مۆنیكا به‌لوچی ئه‌كته‌ر وه‌توانای ئیتالی، بێران سات هه‌ساره‌ی سینه‌مای توركیا، یه‌ڵماز ئوردوگان و بئێلجیم بێلگین ك دو ئه‌كته‌ر ناودار توركیه‌ن، وه‌ل ئاره‌ش له‌باف گورانیچڕ ناودار ئيرانی رۆڵ له‌تێ دوینن.
له به‌ش پێشبڕكێ سه‌ره‌كی 60مین خول فستیڤاڵ ناوده‌وڵه‌تی فیلم سان سێباستییان ك له وڵات ئسپانیا نمایشكريا، تووره‌ج ئه‌سڵانی وێنه‌گر كرماشانی ئی فیلمه، ئه‌را یه‌كه‌مین جار له مێژوو سینه‌مای ئيران و كوردستان تويه‌نست خه‌ڵات خاسترین وێنه‌گردن 60مین خول فستیڤاڵ ناوده‌وڵه‌تی فیلم سان سباستییه‌ن ئسپانی وه‌ده‌سبارێ.
به‌همه‌ن قوبادی له ساڵه‌يل گوزه‌يشته‌يش وه فیلم سینه‌مایی "كیسه‌ڵه‌كانیش ده‌فڕن" و هه‌ميش فیلم سینه‌مایی "نیوه‌ی مانگ" دو خه‌ڵات سه‌ره‌كی زه‌ڕین خاسترین فیلم له فستیڤاڵ ناوده‌وڵه‌تی فیلم سان سێباستییان وه‌ده‌سهاورد.
فیلم سینه‌مایی "وه‌رزی كه‌رگه‌ده‌ن" 104 ده‌قه‌س و مه‌ته‌ڵ شاعرێگ كورد ئه‌را تماشاكه‌ر باس ئه‌كا ك له رێ شعره‌گانییه‌و له شوون ژیان گومبوی خوه‌ی گه‌ردێ.
ا. ج
