ژنه گورانيچڕێگ ناودار عه‌ره‌ب گورانییگ ئه‌ڕا كوردستان چڕێ
مه‌یاده ئه‌لحه‌ناوی ك گورانیچڕێگ سووریه، له‌شوون داوڕيانێگ دريژ، هه‌واڵ تۆماركردن ئی گۆرانییه له ماڵپه‌ڕ ئیلاف بڵاوه‌وبوی.
تێكست ئی گورانییه له لایه‌ن شاعر ناودار عێراقی محه‌مه‌د مه‌هدی ئه‌لجه‌واهری نويسرياگه، فادی حه‌داد ك ده‌رهاوه‌رێگ ناودار لوبنانییه كار ده‌رهاوردن ئه‌ڕاێ ئه‌كا.
مه‌یاده له‌باره‌ی ئی گورانی نوویه وتگه، له دويای توماركردن گورانی ئه‌ڕا وڵات سوریا و لوبنان يه سێیه‌م به‌رهه‌میه ك ئه‌ڕا وڵاتێگ توماری ئه‌كا، وتیش "وه‌گرنگ زانستم ك ئی كاره بكه‌م، وه‌ئوميد ئه‌وه‌گ ئاشتی به‌رقه‌رار بوود و جه‌نگ و كوشتار كووتایی وه‌پێ بيه‌ێد".
مه‌یاده حه‌ناوی له رێ گورانی "أنا بعشائك" له جه‌هان عه‌ره‌بی ناو ده‌ركرد و ماوه‌ی دريژيگه ك له كار هونه‌ری دويره‌وكه‌فتگه، وه‌لی جارجار له‌ڕه‌سانن ده‌رئه‌كه‌فێ و لێدوان سیاسی و هونه‌ری ئه‌ياد.
يه ئه‌ڕا یه‌كه‌مجاره گورانیچڕێگ له ئاست حه‌ناوی گورانییگ تایبه‌ت ئه‌ڕا كوردستان تومار بكا، به‌شێگ تر گرنگی ئه‌و گورانییه ئه‌ڕا تێكست شاعره‌گه گله‌وئه‌خواد.
مه‌یاده له ساڵ 1962 له شار حه‌له‌ب سوریا له‌داڵگبويه، ك به‌شێگ له نیشته‌جايه‌يل شاره‌گه كوردن.
ا. ج
