سڵام له‌وانه‌گ خوه‌يان كانديد ئه‌كه‌ن
شه‌فه‌ق نيوز/ له كۆمه‌ڵگايگ كيشه‌دار و فريه شيوياێ جوور كۆمه‌ڵگاى عراقى و له وجوود مه‌يدانيگ ديد جياواز سياسى، خواست و داواكاريه‌يل له‌تى وه سڕكرياێ مينێد، وه‌ل ئه‌وه‌يشا چشته‌يل فريه‌يگ بوونه هووكار له مه‌ندنه‌وه‌ى ئيچنه بارودوخيگ وه‌بى چاره‌سه‌ر، ئه‌ويش له‌وه‌ر ئه‌وه‌گ ئاوڕوێ و شه‌رمه‌زارێ سياسى له‌ى وڵاته ماناى تر ديرێد جيا له حورمه‌ت فكر و ديده‌ه‌يل جياجياى كۆمه‌ڵايه‌تى. ئمجا هه‌ر له‌ى گووشه‌يشه‌و بايه‌سه ئيمه‌ى فه‌يليه‌يل چه‌وه‌يلمان بشووريم وه ديد سه‌رده‌ميانه دونيا بوينێم.
هه‌وڵ و خه‌بات سياسى و كۆمه‌ڵايه‌تى له‌ى سه‌رده‌مه نرخ تايبه‌ت خوه‌ى ديرێد، له‌وه‌ر خاتر وه‌ده‌سهاوردن مافه‌يليمانيش بايه‌سه له‌بانمان ئه‌و نرخه بيه‌ێم، وه‌لێ زه‌حمه‌ته وه تواناو قودره‌تمان ئى ڕێگه‌ى سه‌خت سياسيه بگرێمنه وه‌ر ك وه‌گووره‌ى قوربانيه‌يليگ دايمنه‌سه‌ى تائيسه ناتگه‌سه تويش فه‌يليه‌يل!!
چويچيانمان دوياى رميان به‌عس و نه‌وين ئيراده‌ى وه‌جه‌م ئه‌را كار، نواگيرى مه‌ردم له پاشگه‌زبوينه‌وه له خه‌مسه‌ردى و جاڕسى نه‌كردگه.
نه‌وه‌ى ئيسه‌مان شه‌كه‌ت بوێ له‌و مێژووه‌و ئه‌گه‌ردێده شوون چشتيگ تر و مه‌يل وه‌رگرتن عبره‌ت ديرێد له هه‌ڵه‌يل گوزه‌يشت و ئاينده‌ى خوه‌ى وه‌و يادگاريه‌يل تيه‌ڵه خه‌رێك ناكا.
پرسيار گرنگ له‌وه خوه‌ێ دوينێده‌و ك وه‌رانوه‌ر گشت ئه‌و قوربانيه‌يله وه خوين و فيداكارى و كووچكردن و مه‌ينه‌تى، ئه‌راچه ده‌سكه‌فته‌يله وه‌ى جووره كه‌من، له‌وه‌ختيگ ك گه‌ردين له‌شوون مه‌ندنه‌وه‌و پيشكه‌فتن ك مه‌سه‌له‌يگ دويه‌كه‌و ئمڕوو نيه؟
كيشه‌ى فه‌يليه‌يل ئه‌وه‌سه هه‌وه‌جه وه نه‌وه‌يگ ره‌خنه‌گر و توێژه‌ر ئاينده دووس و براگماتييگ ديرن ئسپات خوه‌ى بكا وه نه‌فوه‌رگرتن له‌و ده‌رفه‌ته‌يله ك ئه‌يه‌نه وه‌رده‌س، يه‌يش ماناى ئه‌وه‌سه ك بايه‌سه داواكار و مكوڕ بدێ، چوينكه كه‌سيگ نيه وه سياسى له‌داڵگ بوێد وه سه‌ركه‌فتگ هاتوێده دونيا!
له‌ى وڵاته، جموجويل رزگاريخواز هاوسه‌نگ نه‌ويه‌و تواس چاره‌سه‌ر كيشه‌ى گوزه‌يشته‌ى سيه‌ى حوكم وه تون وتيژى و ره‌گه‌زى و تايفى بكا، ئه‌و تون وتيژى ئايدۆلۆجيه ك ئاماده بوى له ماوه‌يگ خويناوى و نه‌وسياوه تا ماوه‌يگ ديار. فه‌يليه‌يل به‌شدار له پرووسه‌ى سياسى له‌وانه‌گ ده‌رفه‌ت ئه‌ڕايان هه‌ڵكه‌فت، بايه‌سه هووكاره‌ى داواكردن مافه‌يل بوون، وه‌نا نه‌وه‌دڵ و دريغيكه‌ر و شه‌رمه‌زار بوون له رێ خه‌بات.
وه‌نا چوين چاره‌سه‌ر كيشه‌ى ئاده‌ميزاد فه‌يلى ئه‌كريه‌ێد له‌عراق؟! ئمجا دوياى گشت ئى هه‌مگه ساڵه ده‌ركه‌فت ئه‌را گشتلايگ ك تكاكردن و گه‌يايكردن پۆسته‌يل و پله‌يل وه‌زيفى و مافه‌يل ديارده‌ێ عه‌يبيگ و ريڕه‌ويگ شكه‌ستخواردگه.
خود متمانه‌يى و به‌شدارى له پرووسه‌ى سياسى وه‌گشت تواناو له‌گشت وه‌خت و ئاستيگ زه‌مانه‌تكه‌ر سه‌ركه‌فتنه، ئه‌وه‌گ ئمڕوو توانا ديرێد، بايه‌سه هه‌وڵ بيه‌ێد خوه‌ى كانديد بكا ئه‌را هه‌ر پۆست و پله‌و ك ده‌رفه‌تى ئه‌راێ هه‌ڵكه‌فێد له به‌غدا. ئمجا هه‌ناى ك ئه‌ژنه‌وێم كورديگ فه‌يلى خوه‌ى كانديد ئه‌كا يا كانديد ئه‌كريه‌ێد ئه‌را پۆست سه‌رۆك كۆمار يا هه‌ر وه‌رپرسيارێتييگ تر، دوير له ئامانج، ئه‌وه ده‌رئه‌نجامى نيشانه‌س له‌بان ژيان و شكانن وه‌ربه‌سه‌يل بى ئوميدى و لاوردن ديواره‌يل ترس له‌وه‌رده‌م ئه‌وانه‌گ زويتر حاكم نه‌وينه‌و ئوانه‌گ حوكم ئمڕوو وه ڕه‌وا نادوينن ئه‌را غه‌يره‌خوه‌يان.
عه‌لى حسێن فه‌يلى
