وەداخەوە... ک هیوچ
شه‌فه‌ق نيوز - كه‌نعان حاته‌م
کتاوەیل شیعە لەباوەت هاتن ئیمام زه‌مان ئویشن، ئاماژەیگ لە روژ دیار بوینی ئەوەسە ئەگەر نەوروز وعاشورا لە روژیگ یەکەو بگرن! ئایا چ پەیوەندییگ هاناوبەین نەوروز و عاشورا لە کورد فەیلی زیاتر؟
چوینکە خاوەن هەردوگ باڵەگەن، روژەیل عاشورا گشت شیعەیل جهان، هەڵبەتە کورد فەیلی وەلیانەو، هانە ماتەمی وزیارەت ئیمام حسێن. لەنەوروز گشت کوردەیل لە جهان، هانە خوەشی و سەیران، هەڵبەتە کورد فەیلی وەلیانەو.
ئەگەرعاشورا ونەوروز کەفتنە یەک روژ، هەرچە شیعەس ماتەمی و زیارەت خوەیان وەڕیەو بەن، وەهەرچە کوردە خوەشیو سەیران خوەیان وەڕیەو بەن، کورد فەیلی نیشیدە ماڵ خوەی، ئیجا ئەگەر وەگوەرەی کتاوەیل شیعە ئیمام زەمان لەو روەژە دیار بەێد، خو تەنیا کورد فەیلی ئامادەس پیشوازی لەلی بکەێد.
پزشکەیل ئویشن، لای راس مەغز ئایەم کۆنتڕوڵ لا چەپینەی لەشی کەێد، و لای چەپ مەغزەگە کۆنتڕۆڵ لا راسینەی لەشی کەێد، واتە ئەو ئایەمە ک تیەێدە دونیا وخوەی چەپێڵە، دەس چەپی وەکار تیەیرێد، لا راسەگەی مەغزی ئەکتیڤترە لە لا چەپەگەی، وئەویگیش دەس راس وەکار تیەیرێد، لا چەپینەی مەغزی ئەکتیڤترە.
بەڵکم ئایەم چەپێڵ، چوینکە خوەی چەپێڵە کۆمەڵگا ناچاری کەێد ک دەس راسی وەکار بارێد لە بڕیگ رەفتار، جوور نانخواردن، یا سڵاو کردن، ئەوە بوودە هۆکاریگ ک هەردوگ لای مەغزی وەکار بارێد.
کورد فەیلی وەیجوورە هەردگ لای مەغزی وەکار هاوەردگە، چوینکە، خوەی شیعەس، خوەی کوردە، کوردپەروەری خوەی هیلێدەی بچوودە ناو ناخ مرۆڤ کورد، تا هرچە ئەزمون شیعەیاتی هەڵگردگە جیگر بکەێد لەناو کوردایەتی خوەی، ئەراوە هەرچە لایەنو حزب کوردی بویە لە دریژایی مێژوو، کورد فەیلی لەناویان وه دڵسوزی خوەی پێشەنگ بویە.
وهەمیش هەنای کوردە فەیلیەگە چوودە ناو ناخ ئەزمون شیعە، دەسپاکی ودڵسوزی وئازایی کورد وەکار تیەرێد لەناو شیعایەتی خوەی، وهویچ لا نیەدەێد لە رینمای ئیمامەیل شیعە، هەرچەن دوینێد فرەی لە مەردم شیعە لەوەخت بەرژەوەنی یا وەخت ترس لە ئەو رینمایلە لادەن، ئەراوە لە ئەزمون شیعە لە گشت لایەنەیل وحزبەیلیان هەمیشە کورد سەروەر بویە و نواره‌وو پێشەنگه.
وچوینکە هەردگ لاگان مەغزی ئەکتیڤە، کورد فەیلی دەروین گەورایگ ئەرا قبوڵ کردن هەردوگلاگە دیرێد، وئەیە هیلێد کوەردە فەیلیەگە بوودە دەمچەرمگ ناو کۆمەڵگا، وبوودە پردیگ هەردوگلاگە وەپیا وەیەک بڕەسن، وەی ئەزمونە دەر ئەرای وازە ک ئەو لایەنەیلە ک لەخوەی جیوازە قەبوڵ بکەێد، ئەراوە لەگشت شارەگان عراق ودەیشت عراق، کورد فەیلی لەناو کۆمەڵگا سەربەرزو دیارە.
مەردمیگ ک بازرگانەیل گەورا وەپیان بڕوا بارێد تا بنیشنە بان کاریان وپشت وەپیان بوەسن لە دەسپاکی وداوانپاکی، ومەردمیگ ک خوەیان وەخوەیان زانن ک لە هویچ لایەنیگ پێشبینی وەرگردن پۆست وپلە نێرن، چوینکە هەر لایەنیگ لە لایگی ترسێد، لایەنە کوردەگە لە لا شیعەگەی ترسێد، ولایەنە شیعەگە لەلا کوردەگەی ترسێد، چوینکە خوەی ئەوە خاس زانێد، ك وەدڵوگیان کارکەێد، ئەرا نمونە، ئەگەر لەدەیشت کارمەنیگ بارید وەپویل ئەراد کار بکەێد، ک ئەو کارمەنە زانێد چەنیگ وەخت و وەچەنیگ پویل کار کەید، وەرانوەر کەسیگ خوەی باید خۆبەخشانە کار بکەێد، ک ئومید وە هویچ پێشکەشیگ نەیرێد، کامیان وەدڵسوزانە کارکەێد؟.
کوردە فەیلیەگە، چوینکە خوەی زانێد ک هویچ وەپی نیەدریەێد، وگشت دڵسوزییگ کار کەێد، جوور کابرای خۆبەخشەگە، ئەراوە، تەنیا ئومیدیگ ئەگەر ئەرا ئی عراقە هەس، تەنیا کورد فەیلیە، بەڵکم وەداخەو، ک هویچ.
