قه‌زا وه‌خوه‌ى و (227) ئاوایه‌وه ئاخرین زوڵم و زوورداى حكوومه‌ته‌یل یه‌ك له‌شوون یه‌ك له‌هه‌ناى ئه‌وه بوى له‌سه‌رده‌م رژیم به‌عس ئه‌را دویاجار ده‌س ته‌عریب و كاولكرى و جیوازكردن مه‌ردمه‌گه‌ى ئه‌را ناوڕاس و باشوور عراق وه‌پى ڕه‌سى و گشت زه‌وى و زار و باخ و بووسانه‌یلى به‌شبه‌شه‌و كریا له‌بان عه‌ره‌ب هاورده ك هه‌ر خیزانیگ (10)هه‌زار دینار سویسرى ئه‌و وه‌خته له‌حكوومه‌ت وه‌رگتن و سه‌دام گوڕوه‌گووڕ بڕیار هاوردنیان دا ئه‌را خانه‌قى و ئاوایه‌یل سه‌ر وه‌و ناوچه له‌وه‌ر ئه‌وه‌ك شوونه‌وار كورد له‌تى نه‌یلیگ ، به‌ڵى ئى مه‌سه‌له ئاشكراس له‌لاى گشت كه‌سیگ و گشتمان زانیم ك خه‌ڵك خانه‌قى چ به‌دبه‌ختى و ماڵویرانییگ وه‌خوه‌یانه‌وه دینه له‌ماوه‌ى ساڵه‌یل فره‌یگ.
ساڵه‌یل ده‌سڵاتدایه‌تى رژیم به‌عس ، عراق وه‌گشتى خسته ناو مه‌ینه‌ت و ده‌رده‌سه‌رى فره‌یگه‌وه‌و خه‌ڵك خانه‌قییش وه‌تایبه‌ت له‌ناونى مه‌رگ و زنده‌یى بى ئومیدیگ ژیان بردیانه سه‌ر ك ناوچه‌گه‌یان وه‌پرووسه‌ى ته‌عریب ناسریاگه‌و هه‌ر چه‌وه‌ڕى ئه‌وه كردیان باوان باوگ و باپیره‌یلیان نه‌وگه تاپوو سیه‌ى هه‌تاهه‌تایى و قه‌ورسان عه‌ره‌به‌یل له‌تى تاریخى كویه‌ن بووگ و نه‌وه‌ى كوردیش له‌ناو ئه‌شره‌ته‌یل عه‌ره‌ب له‌ناوچه‌یل جیاجیاى عراق بتاویه‌نه‌وه‌و زوانه كوردیه‌گه‌یانیش له‌هویریان بچووگ. ه‌وه بوى هه‌ر چه‌وه‌ڕى ڕووژ رووشنایگ كردیان و بتویه‌نن دوباره بچنه‌وه بان زه‌وى و زار خوه‌یان و سه‌رله‌نوو ده‌س بیه‌نه خاكه‌ناز و بیه‌ڵ جفتیارى وخه‌ریك كشتوكاڵى و حه‌یواندارى و پیشه‌یل جووراوجوور خوه‌یان بویتان له‌شوون ئه‌و هه‌مگه ساڵه‌یل ئاواره‌یى و ده‌روه‌ده‌ریه ، ك یه‌یش خاسترین خه‌بات بوى له‌ژیانیان له‌پاڵ ئه‌و خه‌بات چه‌كداریه ك زوورم ڕوڵه‌یلیان وه‌ئشقه‌وه تفه‌نگ شه‌ره‌ف كردنه شان و له‌كویه‌یل سه‌خت كوردستان پێشمه‌رگایه‌تى و كوردایه‌تى راسه‌قینه‌یگ كردیان له‌وه‌ر خاتر ئازادى ملله‌ت و نیشتمان و مناڵ خانه‌قى هویچ وه‌ختیگ حاشا له‌كوردبوین خوه‌یان نه‌كردنه‌و نیه‌كه‌ن و له‌وه‌خت هه‌ڵوژاردنه‌یلیش له‌شوون رمیان رژیم به‌عس ئه‌و چشته وه‌ڕاسى ئسپات كردنه‌و گشت كوردیگیش شایه‌تیده‌ر ئه‌و راسیه‌سه. وه‌لى له‌یوا دیاره مه‌سه‌له‌ى داوڕیان خانه‌قى و شوونه‌یل تر جویر مه‌نه‌لى و به‌دره‌و جه‌سانیش گرینگى یا ئه‌همیه‌ت فره‌یگ وه‌پى نیه‌دریه‌یگ و ئه‌و دروشم یا شعاره له‌هویره‌و بریاگه ك وتیان( یا حه‌مرین یا ئه‌مرین). ئاشكراسه ك خانه‌قى له‌وه‌ختیگ مه‌غووله‌یل وه‌مه‌به‌س داگیر كردن به‌غدا له‌ساڵ (635ك) له‌وه‌راوه هاتنه جویر ئه‌وه‌ك له‌تاریخ باس كریاگه وه‌ته‌واوى رمیاگه‌و خاپوور كریاگه ، دویاى ئه‌وه‌یش هه‌ر له‌سه‌رده‌م عوسمانى و تائیسه‌ى كیشمه‌كیش ناونى هه‌ولێر و به‌غدا هه‌ر غه‌در له خاك و مه‌ردمه‌گه‌ى كریه‌یگ و هه‌ر ئه‌وه‌نه مه‌ندگه مزایده له‌بانى بكریه‌یگ ، ك تاڕاده‌یگ وتنه خاكه‌گه‌ى توایم نه‌ك ملله‌ته‌گه‌ى . یه‌یش ده‌رئه‌نجام ئه‌و خه‌بات وه‌رده‌وامه بوى ك مه‌ردم ئه‌و ناوچه له‌جیاى ئه‌وه‌ك وه‌خاسى و قه‌درو حورمه‌ته‌وه ره‌نج چه‌ن ساڵه‌ى خه‌باتیان بیه‌نه‌ى ده‌سیان و ستایش هه‌ڵویست و نه‌خش گه‌ورایان بكه‌ن ، نوڕید وه‌چه‌واشه‌وه حاشا له‌لیان كریه‌یگ له‌لایه‌ن به‌عزه كه‌سیگه‌وه ك وه‌هویچ په‌تى نیشنه بان حازرى . وه‌ختیگیش حكوومه‌ت مه‌ركه‌زى ئى جووره قسه‌یگ بژنه‌فیگ زیاتر هه‌وڵى خه‌یكه كار ئه‌را سه‌خته‌وكردن وه‌زعه‌گه‌و شایه‌ت له‌پرووسه‌ى ته‌عریبه‌وه وه‌ره‌و فه‌وتیان بووه‌یگه‌ى !! ئیمه‌یش له‌وه ڕخمان چووگ ئى شار كورده‌وارى و پڕ له مه‌ردایه‌تیه ئزرایل گیانى بكیشیگ و كه‌سیش نه‌وگ ته‌ڵقینى بخوه‌نیگ.
