وه‌ختى ڕژیم سه‌دام گووڕوه‌گووڕ ڕمیا و مه‌ردم عیراق وه‌گشتى له‌لى ئاسووده و ڕه‌حه‌ت بوین؛ چوینكه وه‌گووره‌ى زانیاریم و شاره‌زاییم وه‌ل ئه‌ى چین ڕه‌نجكیشه ك خوه‌میش شانازى وه‌وه كه‌م ك پشته‌ڵپشت ئنتما ئه‌راى دیرم، هه‌ست و شعوور جفتیار وه‌رانوه‌ر زه‌وى زانم و خاستریش زانم له ساڵه‌یل دویرى له خاك و زێد و ماواى باوگ و باپیره‌یلیان ئى چین سته‌مدیده چ وه‌یلانیگ وه‌چه‌و خوه‌ى دى؛ له مینه‌كردن كار ئه‌را دابین كردن خه‌رج ماڵ و مناڵه‌یلیان؛ یانه ڕووژانه هه‌ر له سباى ساڵحانه‌و ناو خودا له‌لى هاوردیان و پشت به‌سیان و وه‌كه‌ڵاو جه‌مه‌دانى كورده‌وارى خوه‌یانه‌و ڕوى كردیانه مه‌یدانه‌یل عه‌ماڵه‌كارى له په‌ڕ شاره‌یل ناوڕاس و باشوور عیراق، به‌شكه‌م یه‌خوداس یه‌كى بووه‌یه‌ده‌یان كاركردن، له‌ناونى ئه‌ڵاجه‌ویى هاتن مه‌ردم ئه‌و شاره‌یله ك وه‌ك جویجگه غه‌ریبه نووڕستیانه ئى كه‌ڵاوجمه‌دانى وه‌سه‌ره‌یله ك هاتنه توان مزاحه‌مه‌یان بكه‌ن له‌بان ئه‌و لوقمه‌ى تێڵ نانه ك وه‌هه‌زار ڕه‌زاله‌ت و تیكڵابوین ئاو وئه‌ره‌قیان وه‌زوور ده‌رى كردیان... به‌ڵى تا ڕژیم سه‌دام ڕمیا ئى چین زه‌حمه‌تكیشه وه‌هار عومریان وه‌و جووره به‌دبه‌ختییگ بردنه سه‌ر و ڕه‌سینه پاییز عومر و بڕ فره‌یگیانیش له په‌ڕشاره‌یل وه بى كه‌سى مردن... وه‌لى ئه‌وانه‌گ خودا ئه‌وه‌نه عومر داپییان تا دوباره بچنه‌و ئه‌رابان خاك ئه‌زیز و خوه‌شه‌ویس خوه‌یان و دوباره چه ودڵیان وه زه‌وییه‌گانیان ڕووشنه‌و بوود، وه‌لى دویاى ئه‌وه‌گ ئاز و قه‌وه‌وت جارانیان له ساڵه‌یل سه‌ختى ده‌روه‌ده‌رى جوور گوڵه‌یل وه‌هار ڕزین و ئه‌و ده‌سه‌یله بێڵ ئینگلیزى پان گریانه ده‌س گووچانیگ بویه‌سه خه‌ڵاتیان و ڕووزگار كڕه‌یل و لووچه‌یل خوه‌ى له بان ده‌س و ده‌مچه‌ویان ڕه‌سم كردیه، وه‌ل ئه‌وه‌یشه‌وه ، ئه‌یه هویچ له خوه‌شحاڵییان كه‌مه‌و نه‌كرد و په‌نا بردنه كوڕه‌یل و نه‌وه‌یل نوویان ك ده‌سمیه‌تیان بیه‌ن له دوباره زینگه‌وكردن زه‌وییه‌یلیان، هه‌رچه‌نى ك خاس زانستیان ك ئى نه‌وه‌ى نوویانه هویچ شاره‌زاییگ له مه‌یدان كشتوكاڵ و جفتیارى و ئاویارى كردن و بێڵ وه‌شانن نه‌یرن.
به‌ڵى ئه‌وانه‌گ تویه‌نستن ئى كاره بكه‌ن تویش گیرگرفته‌یل زیاتریگ هاتن ك له خه‌و وخه‌یاڵیانیش نه‌وى، چوینكه یانه له‌یوا فكركردن ك دى ئه‌را هه‌میشه له زوڵم زوور و نانبڕین و ماڵویرانى قورتار بوینه، دویاى ڕمیان سه‌دام و دار و ده‌سه‌گه‌ى و هه‌یواین ئه‌و كه‌سه‌یله ك داگیر زه‌ویه‌گانیان كردوین... وه‌لى دیاره ئه‌یانه وه‌ل زه‌مانه‌و وه‌ل بارووه‌زع ڕووزگاریان تویش مه‌یره‌كه‌یگ هاتنه ك هه‌میشه یان لایه‌ن لاواز و زه‌عیفن و وه‌ته‌نیا تواناى ڕوى وه‌ڕوى بوینى نه‌یرن... به‌ڵى ئیجاره ئه‌یانه كه‌فتنه گیژاوه‌ى مرافه‌ى سیاسى و ئیدارى چوینكه ناوچه‌گانیان كه‌فتنه‌سه بازنه‌ى قه‌یران وه‌رده‌وام و ناویان نریاس ناوچه‌یل مرافه‌دار (متنازع علیها) و وه‌شیوه‌ى ڕه‌سمى هیمان هانه بان ئه‌و پارێزگایه‌یله ك سه‌ر وه حكوومه‌ت فیدراڵن و وه‌شیوه‌ى واقعییگ هانه ژیر ده‌سڵات حكوومه‌ت هه‌رێم كوردستان، و نه حكومه‌ت فیدراڵ عیراق كوومه‌ك و ده‌سمیه‌تیان ده‌ید وتا بتویه‌نن دوباره بچنه په‌ى كار خوه‌یان و نه‌خش و ده‌ور جارانى خوه‌یان وه خاسى بڕانن، وه‌ختى به‌رهه‌مه‌یل كشتوكاڵییان ڕه‌سیاده زوورمى شاره‌یل عیراق و به‌غداى پایته‌ختیش، و نه‌یش حكومه‌ت هه‌رێم كوردستان تویه‌نید وه‌شیوه‌ى خاسیگ ئه‌و كاره ئه‌نجام بیه‌ید چوینكه ئه‌و بودجه ك ئه‌را كوردستان ته‌رخان كریایه و وه هه‌زار كتابنا و كتابكم له نیمه‌ى ساڵ ڕه‌سیده ده‌سیان، به‌ش ئه‌وه نیه‌كه‌ید ك ئى هه‌مكه زه‌وى كشتوكاڵیه وه‌پى خاسه‌و بكریه‌ید و ئى جفتیاره‌یله وه‌پى شاده‌و بوون، ئه‌وه بیجگه له كێشه‌ى كه‌مى ئاو چوینكه وڵات كۆما ئسلامى هاوساى ڕووژهه‌ڵاتمان هه‌م ئاو چه‌م ئه‌ڵوه‌ن له خانه‌قى و هه‌م چه‌م گه‌نگیر له مه‌نه‌لى و هه‌م ئاوه‌یل ناوچه‌یل تر بڕیه و له بان ئه‌وه‌یشه وشكه ساڵى له‌ى ساڵه‌یل دویاییگه وه‌ك ئویشن چینیگ تر ناسه بانى...
به‌ڵى ئه‌زیزه‌یل ئه‌وگ ئى زه‌خم كوێنه و نووه خسته هویرمان ئه‌و خه‌وه‌ره بوى له یه‌كیگ له ئاژانسه‌یل هه‌واڵ په‌خشكریا له دیداریگ وه‌ل به‌ڕێوه‌به‌ر كشتوكاڵ ناوچه‌ى گه‌رمیان ك ئه‌را ئه‌كانیوز ئه‌وه ئاشكراكرد ك "به‌رهه‌م گه‌نم وجویه‌ى ئیمساڵ ناوچه‌گه‌ى سێ قات به‌رهه‌مه‌گه‌ى پاره‌كه‌یه"؛... ئیمه‌یش ئویشیمن له خودا وه‌زیاى بوود و یاخودا هه‌ر خه‌یر و به‌ره‌كه‌ت زه‌وى و زار كوردستان نه‌ك سێ قات به‌ڵكوو سه‌دقاته‌و بوود ... و چرپنیمنه ناو گووش كاروه‌ده‌سه‌یل هه‌رێم كوردستان و وه‌تایبه‌ت وه‌زاره‌ت كشت و كاڵ ك جفتیاره‌یل گه‌رمیان و گه‌رمه‌سیر بران و ئه‌وه‌گ خه‌یر ئه‌وان بوود خه‌یر یانیشه‌و خودانه‌خواسه هه‌ر شه‌ڕیگ تویش ئى لابوود ئه‌ولایش وه‌پى گرفتاربوود و ئیوه‌یش بایه‌سه لایگ له‌لییان بكه‌ین و لاى كه‌م وه‌ك جفتیاره‌یل گه‌رمیان وه‌لیا مامڵه‌ت بكه‌ین!! ... هاوار گه‌ورایگیش كه‌یمن وه ڕوى حكوومه‌ت فیدراڵ عیراق و وه‌زاره‌ت كشتوكاڵ و پارێزگاى دیاله ك وه‌ك چوین هه‌میشه واز له‌ى ناوچه‌یل كوردستانیه نیه‌تیه‌رین و وه‌به‌شیگ له خوه‌دان شماره‌ى كه‌ین، بایه‌سه ئه‌رك سه‌رشان خوه‌دان جیوه‌جى بكه‌ین و وه‌یه‌ك چه‌وه‌و ته‌ماشاى ته‌واو پیكهاته‌گان دیاله بكه‌ین چوینكه وه‌گووره‌ى ئه‌و قانوون و ده‌ستووره ك خوه‌دان نویسانینه‌سه‌ى و ئیمزاى كردینه ئى مه‌ردمه و ژیانیان ئه‌مانه‌تیگن هانه گه‌ردندان و خوداوه‌ن كه‌ریم وتاریخ شایه‌تن له‌بان ئنسان و ڕه‌فتارى و ڕه‌حم له زاڵم نیه‌كه‌ن و بیلا ئه‌زموون ڕژیمه‌یل وه‌رین وه‌ك جامه‌ك له‌وه‌ر چه‌ودان بوود تا بزانین وه‌چ ئاكامیگ ڕه‌سین!!
