له‌تی يه‌ك له‌شوون يه‌كه‌و ده‌رئه‌نجامی ئه‌وه‌سه مامڵه‌ی دووسايه‌تی وئه‌به‌دی وه‌ل كه‌سا نه‌يريگ و ته‌خت و به‌خت فره‌يگ له‌تی شيويه‌يگ و يه‌كيگ به‌رزه‌و بووگ و يه‌كيگ داوه‌زيگ ، جاريش هه‌س وه‌چه‌واشه‌وه ، كه‌سه‌يل فره‌يگ له‌ی دونيا وه‌نك ناهمی و هه‌ناسه‌ی سه‌رد سه‌ره‌و نان و كه‌سه‌يليگيش له‌تی ره‌سينه پله‌و پايه‌و خاسترين ده‌سڵات ، وه‌لی جوير ئه‌وه‌ك زانياری ديريم و ژنه‌فتيمه كاروان كاروان ره‌د كردگه‌و چه‌نه‌ها پاشاو ميرو خاوه‌ن سه‌ڵته‌نت ره‌سانه دويا كووتايی ريگه‌و هيشته‌يانه جی ، وه‌بی ئه‌وه‌ك پرتاڵيگ له سه‌روه‌ته‌يليان وه‌ل خوه‌يانا برودين و گشت داراييان بويه‌سه موڵك ئه‌ی و ئه‌و ، ئی دونيا زه‌خم كه‌س نيه‌پيچيگ و بانان خوه‌ش و هه‌ميشه‌ييگ نه‌يريگ تا دڵ وه‌پی خوه‌ش بكريه‌يگ جوير ئه‌وه‌ك شاعره‌يل وتنه ( هه‌ی دونيا داران ، هه‌ی دونيا دووسان – دونيا تاويگه جوير شاڕو بووسان ) ، مه‌عنای ئه‌وه‌سه موڵك هه‌ر ئه‌ڕا خوداس و ئيمه‌ی ئاده‌ميزاديش له‌بان ئی گووشه‌ی زه‌ويه ميوانيم وهه‌ر وه‌ختيگ گه‌ڵای عومرمان كه‌فته خوار ماڵئاوايی يه‌كجاری كه‌يم وگشت چشتيگمان هيليمنه جی ته‌نيا كرده‌وه‌مان نه‌وگ وه‌ل خوه‌مان به‌يمنه‌ی و ، وه‌پی چيمنه حزوور خودا ، ئمجا ئافه‌ريم ئه‌ڕا كه‌سيگ ك بتوينيگ خزمه‌ت ئنسانيه‌ت له‌هويره‌و نه‌وه‌يگ و په‌ند و عبره‌ت له‌ی دونيا وه‌ربگريگ و خوه‌ی نه‌خه‌يگه وه‌ر ته‌نوير تاو ئاخره‌ت و هه‌ميشه هه‌وڵ ئه‌وه به‌يگ په‌يوه‌ندی راسه‌وخۆ وه‌ل خودای خوه‌يا داشتووگ و هه‌ق كه‌س وه زوڵم نه‌خوه‌يگ ، وه‌لی فره وه‌داخه‌وه جوير ئه‌وه‌ك ئيسه له‌عراق رويده‌يگ و ده‌سڵاتداره‌يل ئی وڵاته له پويل ملله‌ت قرقه‌و دانه‌و سڵ له دزی و خواردن و بردن دارايی وڵاته‌گه نيه‌كه‌ن ونه‌دار وفه‌قيريش هه‌ر خوسه‌ی بی ده‌سڵاتی و نه‌داری خوه‌يگ و پاناگه‌يگ ئه‌را فه‌قير نه‌يشتنه‌سه‌وه ژيان ئاسايی خوه‌ی وه‌پی بووه‌يگه رييه‌وه ، هه‌رچی خه‌يروبه‌ير ئی وڵاته‌سه گشتی وه‌تاڵان بردنه‌و بانكه‌يل وڵاته‌يل تر وه‌پی پڕ كردنه‌و چه‌ويان وه‌هويچ تير نيه‌وگ و نيه‌زانن تام ژيان له‌لای نه‌دارو كه‌مدرامه‌ت چوينه‌و و دزی له‌ماڵ ملله‌ت له‌لايان فره ئاساييه‌و هه‌رچی سه‌روه‌ت و سامان ئی عراقه‌سه كه‌س نيه‌زانيگ وه چ شيوه‌يگ ته‌رفتوينه كريه‌يگ وئه‌را چ شوونيگ ره‌وانه كريه‌يگ و كه‌سيگ نيه وه وژدانه‌وه مقه‌يه‌ت ئی دارايی و ئه‌مانه‌ته بووگ ك درياسه ده‌سی و بيجگه ئه‌وه‌يش خوه‌يان له شاشه‌يل ته‌له‌فزيۆنه‌وه رسوای خوه‌يانه‌يل كه‌ن و دزی يه‌كتری ئاشكرا كه‌ن و ناونيتگ له‌يه‌ك بڕن . ئيمه خوه‌شی ئه‌وه كرديم ك سه‌دام و داروده‌سه‌گه‌ی دويای چل ساڵ له دزيكردن ك ته‌نيا ٥% له‌و داراييه دانان ئه‌را ملله‌ت ، بزان چوين مليان شكياو خه‌يروبه‌ير وڵاته‌گه هيشتنه جی ، وه‌لی جوير ئه‌وه‌ك مه‌سڵه‌ته كورديه‌گه‌ی خوه‌مان ئويشيگ ( وه هه‌ڵنگ هه‌ڵنگ له ده‌م شير ده‌ريكرديم و كه‌فته قه‌پ پڵنگ) مه‌ردمانيگ تر هاتنه بان حازری و هه‌مان ده‌ردوخوسه‌و هه‌مان تاڵانی له‌ليان هاته دی و دی هوير له‌وه نيه‌كه‌ن سه‌دام له‌بان هساو ملله‌ته‌يل چه‌وسياگ عراق چه‌نه قاروون ماڵ نا يه‌كه‌وه‌و ئه‌وه‌سه ئاقبه‌تی وه‌و رووژه ره‌سی ك چوين شوره‌يی و ڕسوايی ئه‌رای مه‌نده‌وه‌و ناوی چيه زبڵدان تاريخ و دويای ئه‌و هه‌مگه ساڵ دزيكردنه له خه‌يروبه‌ير ئی وڵاته سه‌رينی سه‌نگ و كفنيشی بی گيرفان . ئه‌ی دی خوه‌زه‌و بزانيم كييه وه‌ڕاسی خه‌م ملله‌ت خوه‌يگ له‌وه‌ختيگ ناو شارو ده‌يشت له‌رووژه‌يل وه‌رجه هه‌ڵوژاردن پڕ كريه‌يگ له‌دروشم يا شعاره‌يل جووراوجوورو قه‌وڵ ئه‌وه دريه‌يگ هه‌رچی ملله‌ت بتوايگ وه‌بان سه‌ر ، وه‌لی دياره كاره‌گه چه‌واشه‌سه‌و ته‌نيا خه‌ڵه‌تانن مه‌ردمه .
