نه‌چه‌مانگه و ڕوڵه‌يل خاوه‌ن بيروباوه‌ڕ ئه‌ی نيشتمان داگيركرياگه له قوناغه‌يل فره‌يگ، ڕاپه‌ڕينه‌يل گه‌ورايگ به‌رپا كردنه و وه ژن و پياو و گه‌وراو بويچگ و جوان و پير، چينه‌سه گژ داگيركه‌ره‌يل و په‌لامارده‌ره‌يل كوردستان و له‌ڕی ئازادی و وه‌رگری كردن له ئاو و خاك، مه‌ردانه له‌وه‌راوه‌ر دوشمنه‌يل وسيانه‌و وه شانازيه‌و گيان خوه‌يان كردنه‌سه قوروانی و ئه‌را ئسبات كردن ئی ڕاسييه، لاپه‌ڕه‌يل مێژوو ته‌نيا شايه‌تیده‌ره‌يل ڕاسكانین.
ملله‌ت كورد له‌وه‌ر ئه‌وه‌گ وه‌دريژايی تاريخ زوڵملیكرياگ بويه، هه‌ميشه له‌ڕوی نه‌ته‌وايه‌تی خاوه‌ن هه‌ڵويست بويه‌و تا ئيسه‌يش ڕووح كوردايه‌تی و وڵاتپه‌ره‌سی ها له خوينی و وه‌رده‌وام ئه‌را نه‌هيشتن ده‌سه‌ڵات سه‌ركوتكه‌ره‌يل و كويه‌نه‌په‌ره‌سته‌يل له‌گيان و دڵ مايه ناس.
ئه‌گه‌ر لاپه‌ڕه‌يل ته‌ڵايی خه‌بات ملله‌ت كورد بيه‌يمنه يه‌كا دوينيمن ك ملله‌تيگ ئازاديخواز و دژ وه زوڵم و زوور بويه‌و دايمه ته‌قالاكردگه ك هوير و باوه‌ڕی وه‌ل مۆدێرنيزه بوين سه‌رده‌م ڕێك بخه‌ێد، وه‌تايبه‌ت له بوار يه‌كسانی كومه‌ڵايه‌تی له په‌يوه‌ندی وه‌ل ژنه‌يل تويه‌نيم بويشيم ك هه‌رچه‌ن كومه‌ڵگای كوردی كومه‌ڵگايگ دوياكه‌فتگ بويه وه‌لی وه گوره‌ی ناوچه‌يل تر ڕووژهه‌ڵات ناوڕاس ڕيژه‌ی ئازادی ژن له‌تی به‌رز بويه‌و شان وه شان پياو له گشت بواره‌يل چالاكانه به‌شداری كردگه.
ئه‌گه‌ر بايمنه بان مه‌يدان خه‌بات ڕزگاريخواز ملله‌ته‌گه‌مان نكوڵی له‌لی نيه‌كريه‌ێد ك ژنه‌يل كورد فه‌يلييش نه‌خش گرنگيگ له خه‌بات ئازاديخواز ملله‌ته‌گه‌مان داشتنه‌و شوين ده‌سيان له گشت شۆڕشه‌يل كوردی دياره. ئه‌گه‌ر بتوايم باس ئه‌و ئازايه‌تييه‌يله بكه‌يمن بايه‌ته ئاماژه وه ئه‌وه بكه‌يم ك ئه‌ی شيره‌ژنه‌يله بيجگه له‌وه‌گ شوين خالی پياوه‌يل پێشمه‌رگه‌يان له ناو ماڵ پڕه‌و كردنه، ئه‌را مناڵه‌يليانيش هه‌م داڵگ بوينه‌و هه‌م باوگ؛ وه‌ختايگيش هێز پێشمه‌رگه ئه‌را وچان ڕوی كردنه‌سه ئاواييه‌ل و وه ده‌ده و بيس بيس له ناو ماڵه‌يل به‌شبه‌شه‌و بيان هه‌ر ئه‌ی خانمه‌يل ميواندووسه بوين ك وه‌قه‌در و حورمه‌ته‌وه خزمه‌ت وه‌پيان كرديان، هه‌ر له دروس كردن خوراك و جنگ دويرانن بگره‌ی تا ده‌سمه‌يه‌تداينيان و ئاماده‌كردنيان ئه‌را چالاكييه‌يل چه‌كداری.
وه‌لی ژن فه‌يلی ته‌نيا وه‌و خزمه‌ته‌يل لۆجستيه ڕازی نه‌ويه‌و بڕ فره‌يگيش له‌ليان له خه‌بات چه‌كداری به‌شدار بوينه‌و هه‌ڵگردن چه‌ك شه‌ره‌ف كوردايه‌تی وه ئه‌ره‌ك بان شان خوه‌يان زانستنه‌و وه ده‌يان كه‌س له‌ليان ڕوی كردنه‌سه سه‌نگه‌ره‌يل و كه‌ژ و كويه‌يل سه‌ركه‌ش كوردستان و شان وه شان پياوه‌يل پێشمه‌رگه داستانه‌يل بی وينه‌و چه‌ونه‌ترسانه تومار كردنه‌و وه‌ئازايه‌تی خوه‌يان دڵ دوشمنه‌يل هاوردنه‌سه له‌رزه و هه‌رگز سڵ له مه‌رگ نه‌كردنه.
له‌وه‌ركردن جنگ پێشمه‌رگايه‌تی و هه‌ڵگردن تفه‌نگ ژه‌نگ گرتگ و به‌شداری كردن ئه‌ی شيره‌ژنه‌يله له شۆڕشه‌يل كوردی له وه‌ختيگ بوی ك فره له‌ليان هاوسه‌ر و كوڕه‌يليانيش پێشمه‌رگه بوين و به‌ش فره‌يگيانيش داڵگ و خوه‌يشك و هاوسه‌ر شه‌هيد بوين ك وه جگرسزياگ و وه‌دڵه‌يل شكياگ به‌شداری له خه‌بات پێشمه‌رگايه‌تی كردوين؛داخه‌يل فره‌يگ دين و قوربانيه‌يل فره‌يگيش دان....وه‌لی نيه‌زانم ئيسه ئه‌را له‌هويره‌و چينه‌و فه‌رامووش كريانه، وه بی ناز كه‌فتنه‌و كه‌س نيه گووش له قسه‌يل دڵه‌يل نازك و پڕله‌خوسه‌يان بته‌كنێ..؟
نه كه‌س ناويان به‌ێد و نه كه‌سيش له‌باره‌يانه‌و نويسێ!.
ته‌نيا دڵخوه‌شی و هاوده‌ميان ئه‌و ڕه‌سمه‌يل سيه‌وچه‌رمگ لوچ لوچه‌و بويه‌سه ك وه جنگ كوردی و وه‌تاقم و تفه‌نگه‌و، له سه‌ختترين ساڵه‌يل خه‌بات له كه‌ژوكويه‌يل كوردستان بڕينه‌سه‌يان و هه‌روه‌خت دڵيان ته‌نگ بوود له گۆڵه‌جييگ كزكز نيشن و ته‌ماشای ئه‌و ڕه‌سمه‌يله كه‌ن ك هه‌ركاميان بوينه‌سه ميلكانيگ ئه‌را هه‌زاران ئاه و حه‌سره‌ت و هه‌ناسه‌يل سه‌رد..!چمانی هه‌ر ئه‌وسا خوه‌يان زانستنه ك ڕووژيگ تيه‌ێد له‌هويره‌و چن و هه‌ر خوه‌يان مينن و ته‌نيايی و چه‌ن گله‌ييگ ك ئه‌گه‌ر باريه‌نه بان زووان دڵ كۆچگ وه پی تاوننه‌و..!!!!
