كارا به‌شدارى كردنه له دامه‌زرانن پارت دیموكرات كوردستان و هه‌رله‌یوا له سه‌ركردایه‌تى شووڕش ئه‌یلوول جوور شووڕشیگ نیشتمانى میللى گشتى ك فره‌تر چینه‌یل كوومه‌ڵایه‌تى عیراقى له‌تى به‌شدارى كردن. كۆنگره‌ى سێنزه‌ى پارتى كێشه‌ى كورد فه‌یلى و كورده‌یل ده‌یشت هه‌رێم خسته روى و جه‌خت كرد له‌بان وه‌رگرى یا دیفاعكردن له هه‌قه‌یل هاووڵاتیه‌یل كورد له‌وباقى ناوچه‌گان عیراق وداواى دیارى كردن چاره‌نویس بارزانیه‌یل و فه‌یلیه‌یل و قوربانیه‌یل ئه‌نفال كرد و قه‌ره‌بووكردن قوربانیه‌گانیان و كه‌سوكاره‌یلیان له‌و زه‌ره‌دوزیان ماددى و مه‌عنه‌ویه ك تویشیان هات و دوباره بیناكردن شوونه‌یل نیشته‌جابوینیان. له‌هه‌مان وه‌خت جه‌ختیش كرد له‌بان هاتنه‌وه‌ى كورده‌یل فه‌یلى ده‌ركریاى وهاوردنه‌وه‌ى ئه‌و ماڵ وموڵكه‌یلیانه ك له‌لیان زه‌فت كریا و قه‌ره‌بووكردن ئه‌و زه‌ره‌ده‌یله ك تویشیان هات.
عبدالسلام به‌روارى نوێنه‌ر له په‌رله‌مان هه‌رێم كوردستان له په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته ئویشى:" بایه‌خداین وه كێشه‌ى كورده‌یل فه‌یلى یه‌كیگه له ستوینه‌گان سیاسه‌ته‌گه‌ى پارت دیموكرات كوردستان، و ئى هه‌ڵوێسته نوو نیه له‌لاى پارتى ك بڕیگ كه‌سایه‌تى كورد فه‌یلى به‌شدارى كردن له دامه‌زراننى وله‌وانه‌یش سكرتێریگ پارتى" له ئامه‌ژه‌یگ وه خه‌باتكه‌ر حبیب محمد كریم.
به‌روارى زیاتریش وت:" كورد فه‌یلى ئاماده‌بوین خاسیگ داشتن له په‌رله‌مان كوردستان و هه‌رله‌یوا له په‌رله‌مان فیدراڵیش، له‌باوه‌ت ئاماده‌بوینیان له كۆنگره‌ى سێنزه‌ى پارتییش وه چوار كاندیداوه بوى، وه‌لى وه‌داخ فره‌یگه‌و هویچكامیان نه‌ورده‌وه و یه‌یشه حاڵ دیموكراسیه ك هه‌میشه كه‌سیگ سه‌ركه‌فید و كه‌سیگتر نه".
له لاى خوه‌یه‌و عه‌لى حسین فه‌یلى ئه‌ندام په‌رله‌مان كوردستان له قسه‌گانى ئه‌را ماڵپه‌ڕ شه‌فه‌ق ئه‌وه ئاشكراكرد ك :" سه‌رۆك هه‌رێم كوردستان مسعود بارزانى له چه‌ن بوونه‌یگ له بان ئه‌وه جه‌خت كرد ك كورد فه‌یلى و ئه‌و چینه‌گانتر كوومه‌ڵگاى كوردى پیكهاته‌یگن له پیكهاته‌گان ملله‌ت كورد و نه‌بایه‌د جوور كه‌مینه بنووڕیه‌یده پیانه‌و ، و هه‌روه‌و جووره‌یشه له ناو پارت دیموكرات كوردستانیش".
عل حسین فه‌یلى زیاتریش وت:" پارت دیموكرات كوردستان ناسریایه وه ڕیڕه‌وه میانڕه‌وه‌گه‌ى له هه‌ڵوێست یا موقفى وه‌رانوه‌ر گشت پیكهاته‌گان نه‌ته‌وه‌ى كورد و هه‌ر وه‌ى جووره‌یشه له هه‌رێم كوردستانیش، و له‌ى بارروه‌زع ئیمڕووه ئه‌وه دوینم ك كورده‌یل فه‌یلى له ده‌یشت هه‌رێم هه‌وه‌جه‌یان ها وه كوومه‌ك و پشتگیرى له جیاتى ئه‌وه ك له سه‌ركردایه‌تى پارت دیموكرات كوردستان وجوود داشتوون، هه‌رچه‌نى ك ئاره‌زوو داشتیم ك جوور جاران له سه‌ركردایه‌تى وجوود بیاشتیان، وه‌لى ئاره‌زوو چشتیگه و واقع چشتیگتر و شایه‌ت یه‌یشه له‌وه‌ر ئه‌وه‌سه ك جوور جاران قورسایى نه‌یرن له لایه‌ن سیاسى و ئه‌و لایه‌نه‌گانتر، و ڕاسییش ئه‌وه‌سه ك كوردستان ئمڕوو كوردستان دویه‌كه نیه".
عه‌لى حسین فه‌یلى زیاتریش وت:" هه‌رچه‌نى ك كۆنفرانسه‌گه‌ى پارتى ده‌سكه‌فت فره‌یگ داشت و ڕیزمان هه‌س ئه‌را ئه‌و ئاكامه‌یله ك له‌لى كه‌فته‌وه، ك ئومیده‌واریمن وه خاسى بشكیه‌یده مل واقع كوردستان و ئه‌وه‌گ ملله‌ت كورد توایده‌ى باریده دى، بایه‌ته ئه‌وه‌یشه له هویره‌و نه‌وه‌یمن ك هیمان هایمنه سه‌ره‌تاى ڕیگه و جارى نه‌ڕه‌سیمنه‌سه ئاست ئه‌و وڵاته‌یله ك هه‌نگامه‌یل گه‌ورایگ بڕینه له‌ڕیگه‌ى دیموكراسى، وه‌لى ئى ئه‌زموونه مایه‌ى دڵخوه‌شى و ئومیده ك پارتى ستراتیجیه‌تیگ ئاشكرا بگریده‌وه‌ر وه‌رانوه‌ر كورده‌یل ده‌یشت هه‌رێم".
عه‌لى حسین فه‌یلى ئه‌وه‌یشه ئاشكراكرد ك پارت دیموكرات كوردستان وه‌ك جاران وه‌ل كورده‌یل فه‌یلى و ئه‌وباقى پیكهاته‌گان ملله‌ت كورده‌وه وسیه‌ید و وت :" فره‌گرنگه ك پارتى وه‌ل كورد فه‌یلى و ئه‌وباقى پیكهاته‌گان نه‌ته‌وه‌ى كورده‌وه بووسیه‌یه‌د، نه‌ك هه‌ر له كۆنگره و وه‌گووره‌ى ئامار و زوورینه و كه‌مینه، به‌ڵكوو هه‌ر وه‌و جووره‌گ مامه‌ڵه‌ت وه‌ل ئى پیكهاته‌یله‌و بكه‌ید ك مه‌لا مسته‌فاى بارزانى نه‌مر وه‌لیانه‌و مامه‌ڵه‌ت كردیاد".
له‌ى لاى خوه‌یه‌و ئه‌كبه‌ر حه‌یده‌ر یه‌كیگ له سه‌ركرده‌یل پارت دیموكرات كوردستان له‌ى باوه‌ته ئه‌را ماڵپه‌ڕ شه‌فه‌ق ئویشى:" كورده‌یل فه‌یلى به‌شیگ دانه‌وڕیاین له نه‌ته‌وه‌ى كورد، و دویا كۆنگره‌ى پارت دیموكرات كوردستان له‌بان ئه‌وه جه‌خت كرد ك یانه كورد ئه‌سڵمه‌نن و هویچ فه‌رق وجیاوازییگ نیه له‌ناوبه‌ین گشت كورده‌یل له دیدگاى پارتى، و ئه‌رك سه‌رشانمانه ك وه‌رگرى یا دیفاع له‌لیان بكه‌یمن چوینكه یانه عیراقى ئه‌سڵمه‌نن و وهویچ جیاوازییگ وه‌ل ئه‌و باقى پیكهاته‌گان عیراقه‌و نه‌یرن".
